Едвај поминаа два дена од укинувањето на полицискиот час, а веќе бројот на заболените и заразените од корона вирусот нагло се зголемил; починале четворица заболени; пензионерите нагрнале бесплатно во автобусите (макар што само вчера беше бесплатен ден); граѓаните ги наполниле кафеаните и кафулињата, а некои (пазете безобразие!) почнале и да играат по масите, како некогаш кога се славеше 8-ми Март. Општо земено, граѓаните манифестирале крајна недисциплина и неодговорност, како што тоа го правеа и за време на полицискиот час, кога за цели 24 часа дури 50-на граѓани, од вкупниот број на населението, не ја почитуваа забраната за излегување. Затоа, на властите, меѓутоа и на опозицијата, „не им останува“ ништо друго освен враќање назад – дисциплинирање и дресирање на сите граѓани, до еден! П.С. Во целиов хаос никој жив не објаснува (мртвите и така не зборуваат) како ѝ „успеа“ на короната толку многу да го забрза периодот на инкубација (од среда до денес) и толку многу да се прошири за цееели (пазете, цееели!) два дена. Тоа е чудо невидено, па да пукнеш! Затоа, со овој народ „само“ со камшик и со перманетна вонредна состојба. Друго „нема.“
Пишува: Љубомир Цуцуловски
