Би било добро д-р Драган Ѓеоргиев, првиот човек на македонската Комисија за ревизија на некои историски настани, поврзани со бугарската историја, своите колеги од Бугарија да ги потсети на судбината на Македонецот Васил Антовски – Дрен и да им предложи (ако треба и да инсистира) во бугарските учебници да биде приложена и фотографијата од спомен плочата посветена на овој херој, бидејќи довербата помеѓу државите не се гради со премолчување на нештата, туку со отворено и директно кажување на работите.
Треба, исто така, да им објасни (ако не знаат) дека Бугарија, како дел од Тројната фашистичка оска, беше губитничка земја во Втората светска војна, за разлика од Македонците кои активно, со борба, беа на победничката страна, заедно со Западните сојузници и со Црвената армија.
Барем толку овој господин може да направи, наместо да отстапува и да се правда како сè што се прави да се прави за доброто на македонската држава и македонската нација. Ова треба да го знаат и припадниците на младата бугарска генерација, бидејќи вистината досега никому не му наштетила. Напротив, таа само помагала да се стекне взаемна доверба.
