Нема ден, а во нашата земја да не се публикува значајна книга, со уште позначајни идеи, предлози, мислења. Така било и во една соседна земја, во која живеел некаков си човек. Живеел сам, посветен на научната мисла. Толку многу знаел, што и самиот не знал колку сѐ знае. Земјата во која живеел била богата со лековити растенија, кај народот познати како билки. Сакајќи јa утврди корисноста на билките, одлучил да напише обемен научен труд од областа на ботаниката, биологијата и био-биологијта, посебна научна област, позната само во неговата земја. Главна земјоделска култура во земјата биле зелената детелина и уште позелената луцерка. Неговиот научен труд се однесувал на нив кои, сѐ разбира, биле зелени, како што и сѐ било зелено во таа земја. Луѓето биле зелени, кравите биле зелени, кокошките биле зелени, зелени биле… Единтвено незелена била зелената боја. Каква била зелената боја, која единствено не била зелена, никогаш не се разбрало. Својот труд го пишувал темелно и со потребната научна скруполозност. Денес пренесувам дел од студијата.
„Детелината, како и луцерката, се многу важни растенија, т.е. билки. Тие, како и секое друго растение, растат. Кога не би биле растенија, не би растеле. Бидејќи растат, тие се растенија. Растенијата растат за да можат да бидат растенија и затоа се растенија. Овие две растенија (детелината и луцерката) се многу важни растенија, бидејќи без нив нема крави, а без кравите ќе нема луѓе, бидејќи тие на малите луѓе (бебињата) им даваат млеко, кое млеко го пијат трипати на ден и тоа пред секое јадење, после секое јадење и, повторно, пред секое јадење, а потоа и додека спијат. Што значи, пред легнување и пред станување. И така, тие пијат млеко цел живот. Од тие причини, како и од многу други непричини, човекот не може без крави, т.е. без луцерка и детелина, кои се делат на крупна, мала и ситна детелина, т.е. луцерка. Овие двете не се богати со минерали и со други важни состојки и затоа нивното нејадење го стимулира јадењето на други со минерали, меѓутоа и со витамини богати билки, т.е. растенија. Такви билки се… (Следи богат список на билки, заб. Љ.Ц.). Но тие, сеедно што се богати со витамини и други амфетамини, не можат да бидат замена за детелината и луцерката, т.е. за кравите, кои тажно гледаат кон човека сѐ додека не ги измолзе. Потоа, измолзени, мукаат по цели денови. (Следи детален опис на кравјо мукање, заб. Љ.Ц.) Откако кравата ќе се изнамука, таа е задоволна и веднаш оди да пасе друга луцерка и детелина, за да ги зголеми своите вимиња, од кои обилно ќе потече млеко за малите човеци, т.е. дечињата.“
Се разбира дека познатиот научниот труд, на уште понепознатиот научник, не се исцрпува со кусиот извадок што го објавив. Се надевам дека ќе има прилика да приложам и други негови значајни делови. Дотогаш, пријатно.
