Актерот Зоран Љутков од ВМРО-ДПМНЕ на прес конференција од партиското седиште денеска упати остра реакција кон надлежните институции во врска со немилиот и скандалозен настан во кој учествуваат навивачката група “Шверцери” во МНТ во кој беше уништен дел од имотот на театарот и беа упатени недолични слики во јавноста.
Неговата реакција од денешната прес конференција ја пренесуваме во целост:
“Целата македонска јавност е згрозена од синоќешниот вандализам и поганење на македонскиот народен театар.
Болно е за Заев и неговите соработници тоа што со секој изминат ден се повеќе се гледа нивната неспособност нешто да изградат, но недозволиво е заради тоа да сквернават се што некој друг пред нив изградил.
ВМРО-ДПМНЕ најостро го осудува вандализмот и хулиганството од страна на група граѓани во МНТ.
Снимката која излезе во јавноста, а од која се гледа како се оштетува имотот на МНТ е срамна и доказ дека со оваа власт е пробиено дното
МНТ е институција за одржување на театарски претстави и културни собири, а не сцена за дивеење на навивачки групи.
Директорот на МНТ мора да одговори како можел да дозволи изнајмување на театарот на навивачка група, и по кој основ е издаден театарот, колку е платено за неговото издавање и руинирање, и дали воопшто е платено? Како може да се издава театарот само со јавување на телефон, па нели има правилник и процедура за тоа, и на крај кој ќе сноси одговорност и кој ќе ја плати штетата? И зошто никој од обезбедувањето не реагира кога поединци почнаа да дивеат и да се качуваат по седиштата.
До каде оди лудилото на оваа власт!?
Одговорност мора да има и од заменик министерот за култура, министерот за култура, националниот координатор за култура, како и советниците за култура на Зоран Заев. Со овие луѓе на чело, културата одамна е пропадната.
Почитувани,
На местото каде во петокот вечерта се дивееше големите имиња на македонскиот театар поминуваат часови, денови и месеци во проби и претстави. Творат и работат. Ова е потценување и понижување и на нивниот труд.
МВР мора најбрзо да ги пронајде сторителите на вандалскиот чин и да ги казни согласно законот.
Се друго ќе биде само потврда дека овој вандалски чин е свесно организиран.
И за едно сте во право господине премиер, манифестацијата и не била баш културна.”
