По години многу и векови цели
По многу желби по многу молби
По многу жалби по многу молитви
По многу клетви по многу прозби
По многу риданија и жешки солзи
По многу тешки искушенија
Конечно избраните
Конечно повиканите
Конечно роднокрајците
Од мајка родените
По тешки кавги по долги бденија
Изнајдоа пари мајстори и решенија
И на Желевица мост изградија.
Мост што ги спојува двете страни
Мост што ги спојува двата брега
Мост што ги спојува селото и полето
Мост што ги спојува минатото и иднината
Мост што ги спојува животот и смртта.
Секогаш на секоја задушница
На секој погреб и помен
Луѓето од моето село
Кога на гробишта одат
И кога по мостот поминуваат
Од името на мртвите и живите
На тие што мостот го изградија
Името им го споменуваат
И стократно ги благословуваат.
Пишува: Васил МАНЕВСКИ
