Вчера демонстранти од цела Македонија кои пристигнаа попладнето во Скопје буквално ги окупираа сите приоди кон зградата на Јавното обвинителство во центарот на Скопје. Граѓаните на повикот на Претседателот на ВМРО-ДПМНЕ Христијан Мицкоски се одзваа во огромен број пред зградата на заробеното обвинителство кое според се она што можеше да се види и слушне во јавност лиферува обвиненија по нарачка и диктат на Зоран Заев.
Револтот од блокадата на зградата на Јавното обвинителство се претвори во слеана река на незадоволство која во збиени редови имаше уште една дестинација пред себе.
Обесправената толпа на луѓе се упати кон зградата на Врховниот суд и Кривичниот суд носејки во рацете црвен картон за сите неправди кои Зоран Заев и неговото заробено судство ги нанесоа врз огромен број на граѓани. Овде присутните на почетокот на собирот веднаш по Химната на Република Македонија во еден глас порачаа:
“Никогаш северна, само Македонија”.
Опсадата од над 20.000 граѓани на Врховен и Кривичен суд беше силна порака за надлежните и одговорните лица во заробеното судство на Зоран Заев дека овој народ неправди повеќе нема да трпи.
Малку беше времето на овој собир пред седиштето на највисоките судски инстанци во државата за да се набројат сите неправди, сите пакости кои ова злосторничко здружување раководено од еден човек ги има направено врз Македонските граѓани.
Христијан Мицкоски со жестока реторика го именуваше Зоран Заев како правдоубиец во државата по што ги разобличи суштината и природата на владеењето на Заев:
-И нема мака пред камерите лажно да се прикажува дека бил европски политичар, кој еве гледаме уште железни опинци не облекол, дека градел едно општество за сите, дека е визионер. Човек гледа и не може да се изначуди. Каква визија какви бакрачи. Чувме во аудио материјалот што е реалноста, да цитирам ли: “договорено е со Врховен”, “без Заев не се може”, “трас-трас и ете одлука на Врховен суд”, “Катица знае за се што треба да се случи”, или закон за СЈО или одлука на Врховен суд ама случаите ќе паднат. Ете тоа е вистината.
Тоа што нема никаква реакција од обвинителството на Русковска цели две денонокија по шокантните сведоштва за влијанието на Зоран Заев врз обвинителството и судството во јавно објавените прислушкувани разговори, дополнително фрла жар во лицето на правдата и уште толку го разгорува револтот кај правдољубивите граѓани.
Зборовите на Христијан Мицкоски од синоќешниот протест во наредниот период ќе бидат своевидна водилка за преиспитување и потврда во борбата на Македонскиот народ, Македонија да застане на здрави нозе наспроти криминалот и неправдите кои го клекнаа народот и институциите на колена.
-“Ако Заев е “капо де тути капи” на мафијата, главните советници и верни заштитници на неговиот криминал се Вилма Рускоска и Љубомир Јовевски. Запомнете ги овие имиња. А гледаме дека ништо помалку не биле ниту Врховните судии. Нивните усти се замолкнати додека ни се уништува државата, додека ги губиме институциите. Овие двајца плус уште неколку врховни судии засилени со уште неколку медиумски слуги кои не се новинари, а така се претставуваат, се единицата за брза интервенција за спасување на Зоран Заев. Ама ова пустото не се брани. Луј Витон судството е последица на Луј Витон премиерот, мераклија за куферчиња и пари. За пусти пари. Не може луѓе да одат во затвор за кутија цигари, а за кражба на држава да стануваат премиери. Тоа не може и на 12-ти април ќе му го покажеме местото каде му е. И при една ваква поставеност на работите, овој истиот Заев одовде, на маршот кој го правеше им порача на судиите да не се плашеле од Мицковски. Јас би рекол познато ни е дека овој човек не знае што зборува и е непресушен извор на гафови ама замислете судиите да не се плашеле од мене, и ова ги предупредува човеков што е на власт три години и владее брутално, човекот кој викаше дека Младенов бил убиен, а за децата на Смилковско има други убијци и така се додека не ги ослободи. Човекот кој Диво Насеље го спореди со игра камај и ги остава терористите да се гоштеваат по затворите како да се холивудски звезди. Човекот кој слава стекнуваше на страшното убиство на Нешковски за да после да се слика со убиецот и да го пушти да избега. Таков ли монструм ќе објаснува на судот да не се плаши од мене кој цел живот со книга и пот се пробивав. Единствен што треба да се плаши е тој. Зашто многу се огреши. А во животот има карма ние ја викаме Божја промисла. И се се враќа, се се плаќа
-соопшти синоќа Христијан Мицкоски.


