Кандидатот за градоначалник од ВМРО-ДПМНЕ за Пробиштип Тони Тоневски, кој воедно е и актуелен градоначалник, истакна дека по изградбата на атмосферската канализација заврши и асфалтирањето на улицата „Гоце Делчев“, која е во централното градско подрачје. Со овој проект е опфатено и изградба и асфалтирање на нов паркинг простор кај детската градинка. – Овој проект е донација од Светска банка, вкупниот износ му е околу три милиони денари, кои се донација, и околу 500.000 денари кои се обезбедени од буџетот на Општина Пробиштип, рече Тоневски. Тој истакна дека проектот за улицата „Гоце Делчев“ почна да се реализира во август, а во него беа опфатени изградба на атмосферска канализација, нови тротоарни површини и околу 2.500 метри квадратни асфалтирање на новиот паркинг-простор и на улицата.
