Во вторник 22.10.2019 година во просториите на Јавната општинска библиотека “Искра” во Кочани ќе се одржи промоција на книигата “Црвени Стени” од авторката Ленче Стоименовска.
Во книгата „Црвени стени“ – вокално инструментален состав Оризари од роднокрајната авторка Ленче Стоименова, се опишува културно-забавниот живот во Оризари, а слободно може да се каже и во цела источна Македонија во период од 1971 до скоро 1981 година. Тоа е период од десетина години во кој се живеело весело, опуштено и без брзање.
Осум млади момчиња, ентузијасти, без услови за работа, без пари, млади и неискусни, успејаа со своите исклучиво живи свирки во секое населено место, село или град, да стават печат на своето време достојно за паметење. Со должна почит: Борис, Стојчо, Драган, Душко, Илија, Јордан, Мите и Трајчо. Тие лично секој на свој начин ќе ни ја раскаже својата приказна од тоа време, како станале добри музичари и популарни и ќе ни одговорат на сите прашања: Кој? Како? Кога? Зошто?
Иако млади и неискусни успеваат да набават одлична музичка опрема од Белград, Загреб, Трст, Скопје и да понудат квалитетна музика пријатна за слушање. Нивниот пат до овој успих е поплочен со многу тешкотии, но тие имаа толку силна желба што никогаш и ништо не успеа да ги поколеба. Интересни се нивните приказни.
Воопшто не е спорно дека нивниот пример на искрено другарство, ненаметливост, толеранција, многу работа и железна дисциплина, може да биде како пример за идните генерации. Примерот е многу јасно даден.
Промоцијата на книгата ќе започне во 17.00 часот.
За авторот:
ЛЕНЧЕ СТОИМЕНОВА е родена во Кочани, а живее во населба Оризари. Активно вклучена во културните настани во градот триесетина години. Нејзиното творештво е на повеќе „фронтови“ како ретко кој. Пишува афоризми, поезија, проза, драмски текстови за деца и возрасни, црта карикатури. Рецензент, промотор, илустратор. Може да се каже дека е успешна во сите овие области и наградувана со највисоки награди: Роман на годината.Збирка поезија на годината за деца и за возрасни. Писател на годината. Афористичар на годината. Награда за Севкупно творештво. Награда за животно дело. Поголем дел од овие награди се од Меѓународни манифестации од областа на литературата и поезијата. Застапена е во Антологија на македонскиот афоризам и Антологија на Балканскиот афоризам и коавтор на поголем број книги од областа на сатирата, за кои е наградувана повеќе пати, претежно со прва награда.
Автор е на следните книги:
1. Жегла (2001) афоризми, Ледена кока кола (2005) роман, На Велигден (2008) поезија за деца, Покажи ми ја среќата (2011) роман, Зборови се редат, приказни се предат (2013) приказни за деца, Буба лази (2015)афоризми, Врзани до последен здив (2016) поезија за возрасни, Обесена на врат (2017) афоризми . „Црвени стени“ (2019) ВИС Оризари е нејзина деветта книга.
