Денес во 18:00 часот на плоштадот „Слобода“ во Штип ќе се организира протестен марш против двојазичност и промена на името. Протестот е во организацијата на студенти од штипскиот универзитет. Поводот и мотивите за овој протест како што истакнуваат организаторите е младите да го кренат гласот против разнебитувањето кое и се случува на Македонија преку изгласување на неуставен закон за јазици и преку нетранспарентното водење на преговори за името на нашата држава. Како што истакнуваат тие се водени од идеалите на славните наши херои и борци за слободна и независна Македонија. Овој марш има непартиска природа и поканет е секој оној кој не се согласува со воведување на двојазичност во неговата општина и секој оној кој мисли дека Македонија губи во преговорите за името. Покрај протестна порака овој настан ќе има и културен карактер. Истиот ќе биде збогатен со музичка програма, настап на фолклорен ансамбл и говор на студенти. Исто така претставници од организациониот одбор ќе положат и свежо цвеќе во штипско Ново Село во дворот на училиштето каде учителствувал големиот деец и револуционер Гоце Делчев. Студентите повикуваат секој кој мисли добро за иднината на младите во Македонија да им се приклучи на овој протестен марш.
