Во своето прво обраќање кон Македонската јавност новиот Министер за внатрешни работи во техничката влада која треба да ги спроведе изборите на 12 април, Наќе Чулев кој што е предложен од ВМРО-ДПМНЕ го користеше единствено името Република Македонија за својата земја.
Дополнително во одговор на новинарското прашање тој се заложи за преиспитување на сите незаконски издадени решенија во МВР преку согледување на состојбата и обелоденување во јавност на сите незаконски постапки.
Тој ја истакна важната улога која ја има МВР во контекст на претстојните предвремени парламентарни избори како и зачувување на безбедносната состојба на потребното ниво во државата.
-Приоритетна цел во наредниот период на мене како технички министер за внатрешни работи на Република Македонија пред се ќе биде организирање на мирни, фер и демократски избори и за таа цел ќе бидат превземени широк спектар на мерки и активности во насока на превенирање на евентуални обиди на криминални, насилни и други структури за нарушување на изборниот процес. Дополнително со оглед дека се работи за сензитивен безбедносен период ќе бидат во соработка со меѓународни организации и други државни институции во Република Македонија ќе бидат превземени активности за стабилизација на државата и за заштита на уставниот поредок и безбедност на граѓаните. Што се однесува до последните решенија кои се дадени во изминатите три дена вклучително и во текот на денешниот ден, сметам дека ни треба еден период на согледување на состојбата во Министерството за внатрешни работи и за најмногу за неколку дена ќе излеземе со официјално соопштение во однос на најголем дел незаконски дадени решенија.
-соопшти Наќе Чулев од прес салата во Македонскиот парламент.
