Градоначалникот на Општина Штип, Благој Бочварски вчера на прес јавно ги презентираше своите „дела“ во првите 100 денови од неговото владеење. Од кажаното и презентираното се добива впечаток дека властите од „Новиот живот“ како да го загубиле компасот и осетот за тоа што претставува проект. Па така во брошурата на Бочварски како проект може да се најде наместо ИЗГРАДЕН имаме ПОДГОТОВКА за идна изградба на стационар за кучиња. Понатаму, наместо ВОВЕДЕН имаме ПЛАН за воведување на јавен градски превоз. Наместо гас за секое семејство добивме ЗАПОЗНАВАЊЕ со можностите Штип да биде гасифициран.
И така жителите на Општина Штип наместо дела добија средби, планови и дебати
Она што е најкарактеристично се бројните средби со владини и невладини претставници и истите се претставени како проекти. По се изгледа актуелниот градоначалник не може да го фати ритамот на неговиот претходник па за да ги пополни страниците и брошурата да биде колку толку разновидна пишува и презентира се и сешто. Граѓаните од сите овие наведени ДОГОВОРИ, МЕМОРАНДУМИ, СОРАБОТКИ не видоа никаков бенефит.
За да може вистински животот да дојде за граѓаните на Општина Штип, градоначалникот ќе мора да почне реално да работи а не да си игра градоначалник на божемски. Граѓаните на Општина Штип се научија на крупни инвестиции и макотрпна работа, затоа предизвикот пред кој е исправен Бочварски е голем исто како што беа големи неговите предизборни ветувања.
