Кога последен пат сте биле на пазар? Некој од тие несоодветно уредените, под ведро небо каде граѓаните -консументи одат да купат прехрамбени намирници за себе и своите семејства? Прехрамбени продукти наберени од испуканите раце на Македонскиот земјоделец, а многу често продавани од брзите раце на Македонскиот прекупец.
Кога последен пат сте отишле на тезга да се ценкате за намалување на цената на боранијата, кромидот, лукот…? Дали вака се ценкате и кога идете во маркет да купите слични намирници?
Кога последен пат сте забележале дека цената по која Ви ги нудат земјоделските производи трговците на тезга Ви се премногу скапи?
И кога последен пат сте слушнале дека на производителот на земјоделски производи му е таман цената по која го произведува и продава својот производ?
И наспроти константната загуба, повторно и повторно, секоја година Македонскиот земјоделец ги ора нивите, го собира родот и се обидува да го прехрани семејството ….
Овие парадокси на Македонското земјоделие се веројатно неможни за решавање и од најголемите светски умови и аналитичари.
Во Македонија, во 2020 година ваквата вештина за обезвреднување на вистинската цена на земјоделските производи што е присутна единствено на тезга на пазар, претставува сликовита метафора за политичките случувања кои го дефинираат животот на сите граѓани во државата.
За секое прашање во политичките кулоари на власта важи принципот “На ти го, дај ми го”, кој што комбиниран со другиот принцип “Што не може со пари, ќе може со многу пари” ја претвори Македонската политичка сцена во најперверзна тезга на зелен пазар што некогаш постоела под ова небо. Оваа тезга со актуелната гарнитура на власт во нормални држави на други места се нарекува “Парламент” а кај нас едноставно “Кула- Вавилонска”. И само кај нас од целото балканско опкружување оваа кула нема свое дно, па така штом човек ќе помисли дека стапнал на нешто што наликува на под, се појавува нова дупка која проголтува “се живо и диво”.
За да биде перверзијата врвна а нашиот Македонски пример како по правило најекстремен во своето постоење, трговците на таа вавилонска тезга, тргуваат со работи кои што никогаш не им припаѓале.
Во некогашен Вавилон “дамите во црвено” барем тргувале со нешто што било нивно- нивните тела, а овде во современиот Македонски Вавилон политичките пртетставници тргуваат со нешта што не им припаѓаат.
Политичката демагогија и историјата на лажни неисполнети ветувања има свои корења во секое демократско општество, чиј што развој и прогрес се темели во огромна мера на способноста на граѓаните пред време да ги препознаат ваквите појави. Управувањето со парите и ресурсите на државата во вид на современ парламентаризам во развиениот свет е дефинирано низ законски-пропишани процедури преку кои се настојува да се обезбеди интересот на граѓаните.
Мо овде во Македонија, во услови на хибриден режим како што беа оквалификувани приликите од угледни светски институции, управувањето со парите и ресурсите на државата е подредено на политичките интереси за моќ, контрола и влијание на Зоран Заев и неколкумина политички и финансиски моќници собрани околу него во формаа на злосторничко здружување со сопствени лукративни агенди за нивно идно политичко профилирање.
Како поинаку да се протолкува изминатата недела во која на тезгата на Македонскиот- вавилонски пазар наречен “Собрание” се појавија (по втор пат) ГМО продавачи на ветар и магла со намера за профит единствено за сопствен личен интерес во предвечерието на затварањето на самата пазарна сезона?
Лицитацијата со несреќата на Македонскиот народ денеска стигна и дотаму што истата беше два пати едно по друго продавана. Главниот аргат на тезгата, седејки на највисокото столче денеска двапати го продаде својот бајат производ само за неколку секунди, пред очите на целокупната македонска и светска јавност и никому-ништо.
Македонскиот скромен правен систем а впрочем и било кој друг нормален правен систем не познава категорија на “Поништување на гласање” на пратениците за само неколку мигови потоа да се гласа повторно за истата одлука во собрание…
Што да се каже а да биде во рамки на здравиот разум?
Ова тезгарење на највулгарен начин што се случува пред очите на сите си има своја цена, која на крајот пак ќе ја платат граѓаните. Наемниците кои располагаат со оваа тезга многу бргу ќе ги снема од видик. Заедно со прибраните пари од продажбата на Македонската несреќа во изминатите години.
И повторно долги години по ваквото “тезгарење” Македонскиот народ ќе трпи во немаштија и егзистенцијални проблеми. Зборувам за скромниот, кроткиот народ кој нема никакви допирни точки со актуелната политичка елита во државата кои крпат крај со крај секој Божји ден под ова парче небо. Апатијата која се обидуваат да ја наметнат актуелните власт на СДСМ и Зоран Заев во државата им одговара само ним во функција на одржување на моќта и влијанието кои го детерминираат секојдневието на мнозинството граѓани во Македонија.
Оттука “мурафетот” на “првата фотелја” во овој хибриден режим кој со своите вавилонски тезги продава вредности кои не се негови, ќе продолжи да му носи профит на Зоран Заев се дотогаш додека на некој друг пазар не се понудат здрави производи со кои ќе почне да се храни овој колабиран животен организам наречен Македонија.
Пишува: Кирчо Анастасов


