Дарија Андовска е композиторка, пијанистка и авторка на оркестарска, камерна, солистичка, вокална музика, музика за филм, театар и танц, како и на мултимедијални проекти. Нејзините дела се изведувани на бројни домашни и светски фестивали, почнувајќи од Македонија, Бугарија, Србија, Хрватска, Словенија, Швајцарија, Италија, Германија, Франција, Англија, Шведска, Норвешка, Русија, Мексико, Канада, САД, а наградувана е како една од важните млади композитори во Европа и од Балканот.
Од 2010 година Дарија Андовска работи како Доцент по група теоретски предмети со композиција, диригирање и музикологија на Факултетот за музичка уметност- Скопје, Универзитет Св. Кирил и Методиј, како и на Факултетот за драмски уметности по предметот Применета музика. Во периодот од 2001 до 2010 година работи на истиот факултет како асистентка по предметите Музички форми, Хармонска анализа, Полифонија и Основи на музичкото дело. Работела и како музичка новинарка и продуцентка во Македонската Радиотелевизија и како авторка на сценарија, композиторка и ко-режисерка.
Денеска, во „Милениум чапел“ во Сент Џулијан, на Малта, македонската композиторка Дарија Андовска ќе се претстави со целовечерен концерт насловен „Течен – кристал“ како што е наречено и нејзиното авторско цеде во издание на СОКОМ. Автор на видеата е Мартин Иванов.
