Мислам дека нашата иднина не е во развивањето на земјоделието, сточарството или индустријата. Таа не е ниту во трговијата, ниту во НАТО или ЕУ. Нашата иднина е во фризерајот. Зошто? Затоа што секој ден нешто се чешла/фризира. Час се чешла минатото на тој-и-тој. Час се чешла потеклото на имотот на тој-и-тој. Час се чешла овој или оној предлог, анекс, кодекс, содекс. Потоа, се чешла Деталниот урбанистички план на општината таа-и-таа, или аферата таа-и-таа. Потоа, се чешла работата на СЈО, на ЈО или аферата не-знам-која-по ред. И, да не должам – јасно следи дека иднината е во фризерајот, во фризерајот и само во фризерајот. Дури можеме и името повторно да го преимануваме и наместо Република-Таа-И-Таа, која се наоѓа Северно од… Северно од…? Заборавив северно од што беше, но северно од нешто беше. Но, тоа и не е толку битно. Битно е да бидеме Република Фризерај. Или, пократко – Берберница. Стрижењето и бричењето во неа ќе бидат бесплатни, како што се и сега, впрочем.
Љубомир Цуцуловски: ФРИЗЕРАЈ
