Што се случува со бројот на студентите запишани на втор циклус на студии на Универзитетот „Гоце Делчев“ во Штип е прашањето кое си го поставуваат упатените во професорската фела.
Имено, УГД на втор циклус на студии на 13 факултети според распишаниот конкурс примаше 1584 студенти а запиша само 90.
Забележително од објавените резултати за запишаните кандидати дека на некои факултети и насоки нема запишано ниту еден студент. Па се погласно се поставува прашањето дали веќе опаѓа мотивот за учење и напредување кај новите генерации или пак понудените насоки и студиски прогами не се доволно атрактивни за новите потенцијални студенти. Во изминатите години посебно во почетоците на своето постоење не беше редок случај кога се бараше место повеќе на одредени насоки на некои факултети, па бевме сведоци дека на одредени насоки се запишуваа и по 200 студенти.
Што навистина се случува допрва останува да анализираат надлежните во оваа област, меѓутоа едно е сигурно дека малиот број на запишани студенти ќе значи дека одредени професори ќе останат без наставни часови бидејќи нема на кој да предаваат, а тоа секако по себе ќе повлече и финансиски импликации како за професорите така и за самиот Универзитет.
