Интегрален текст на Весна Ничева- Советник при Советот на Општина Штип во врска со задолжувањето на родителите на децата во градинката Астибо во Штип да плаќаат за неиспорачани услуги:
“Почитувани,
Се наоѓаме пред Градинката Астибо, онаа која на родителите од Штип им приреди изненадување со негативна содржина.
Имено, во овој тежок период, кога некои од граѓаните земаат плата од 7.000 денари, градинката, како јавна институција, наместо да помогне, родителите ги обременува со трошоци.
Астибовата градинка ги задолжува родителите да платат по 521 денар месечно, или вкупно 2.605 денари, за периодот кога децата не биле во градинка. Или поточно, родителите со две деца во градинка треба да платат 5.210 денари за не добиени услуги!
Градинката, како Итар Пејо, се повикува на договорот кој го потпишува со родителите и согласно кој, навистина треба да се платат материјални трошоци доколку детето не оди во градинка, а се чува неговото место, меѓутоа градинката заборава дека споменатиот период истата стави катанци на своите врати.
Така, правдањето на директорката дека материјалните трошоци мора да се платат, затоа што веќе се согласиле на тој услов – паѓа во вода. Но, нејзината дрскост овде не завршува, туку продолжува со оправдување дека парите ќе се трошат за средства за дезинфекција, кое го создава прашањето дали од родителите се бараат донации или се врши наплата на недадени услуги?
Ние, како Советничка група на ВМРО-ДПМНЕ целосно ги поддржуваме бурните реакции и ставовите на родителите.
Затоа, како надлежни за утврдување на цената за престој во градинките, ќе поднесеме иницијатива до Совет на Општина Штип со која ќе побараме да се ослободат родителите од плаќање на градинка од април до септември 2020 година, затоа што реално, во тој период, градинките не испорачуваа услуги кон родителите и децата!”
