По двонеделно отсуство од јавност поради неговата самоизолација Драган Ковачки утрово упати своја реакција на најзабележителните порази на државата и институциите под раководство на актуелната власт во изминатите две недели…
“Ви благодарам на сите што ми изразивте поддршка во борбата со КОВИД-19. Веќе се чувствувам многу подобро и закрепнувам за борбата што не’ чека за подобро утре на Македонија.
За жал, за само 2 седмици колку што немам објавено пост, толку колку што можев следев што се случува на политичката сцена. Се изнаслушав лажни вести за вакцините што никако да стигнат, а гледам дека Кинезите дури и авансот ни го вратиле. Го видовме и договорот за дефокус со пуштањето па “натерување” на бегалецот сам да се пријави на место по свој избор (што ли тоа и да значи).
Повторно видовме нов меѓународен скандал на двоецот Заев – Шекеринска поврзан со предлогот за амбасадор во САД што не можел да помине безбедносни процедури. Значи, продолжуваат јавно и дрско да ја бламираат државата, а одговорност нема.
Конечно, го видовме и класичното безобразие сами да си предложат и да си гласаат доверба на Влада (без можност за расправа) и тоа истиот ден кога идните генерации ги задолжија за неверојатни 700 милиони евра (!!!).
Дополнително, ни пуштија национална бугарска ТВ на денот кога ја слават Обединета (Голема) Бугарија, а нашиот министер за надворешни работи изразува загриженост за правата на Бугарите во Македонија. Супер. Министре, а за правата на Македонците кога ќе изразите загриженост? Или нас може да не’ гази кој стигне?
Што е бре ова лигавење и самопонижување? За што сте платени од македонските граѓани, да коленичите или да се борите?
Во меѓувреме, добивме уште еден шамар, овојпат на полето на слободата на јавното изразување и политичките слободи, односно на листата на Фридом Хаус повторно и повторно тонеме. Секако, власта си одмолчува и за овој показател.
Се пофалија и со план за борба со корупцијата. Планови, програми, концепции…Како сакате наречете ги. Ништо од тоа нема да биде се’ додека власта нема ниту визија ниту одлучност, иако очекувам да фингираат неколку случаи за нивни лица од пониските ешалони за да ни докажат дека не се селективни.
Како и да е, несериозно е да тврдиш дека досега немало борба со корупција затоа што сме немале План. Старите викаат дека хартијата трпи се’.
Неколку дена пред да го објават планот за борба со корупцијата, противзаконски си вработија истакнати партиски кадри во Агенцијата за национална безбедност. Се мислам што на ова ќе каже Прибе?
Циркусот и лудилото што ни го приредува владеачкава криминална структура на Македонија е за во Гинис, а Медрано може да дојде и да учи забава за широки маси.
Оваа држава не памети толкава неспособност и криминализација, неодговорност кон јавното здравје и пумпање со лажни вести, како и коленичење пред соседите цело време на штета на македонските граѓани.
Со што ги заслуживме овие политички дилетанти да не’ понижуваат и да ни се смеат в лице?
За оваа несериозност, неспособност и безобразие мора да има одговорност.
#ГенераленРемонт”
– напиша Драган Ковачки на неговата фејсбук страница.
