И оваа година како по традиција нема да се одржи Меѓународната манифестација “Голачки Фолклорни средби”.
После минатогодишното откажување на манифестацијата поради пандемијата од Ковид-19 оваа година овој уникатен културен спектакл е откажан поради забраната за движење во планина заради превенција од појава на пожари.
Од кабинетот на Градоначалникот на Општина Делчево кој што е покровител на настанот упатија соопштение до јавноста во кое се вели:
“Поради актуелната состојба со пожарите на територијата на Делчево, целосната забрана за движење во шумите и шумското земјиште и прогласената кризна состојба поради пожарите, Меѓународниот фолклорен фестивал „Голачки фолклорни средби 2021“ кој традиционално се одржува на планината Голак на врвот Чавка, вечерта на 8 август спроти верскиот празник св. Пантелејмон, нема да се одржи.Организаторите на манифестацијата, НУЦК „Никола Јонков Вапцаров“ од Делчево и Општина Делчево порачуваат дека алармантната ситуација со пожарите во Делчевско наметнува ваква одлука, а имајќи го предвид фактот дека животот на граѓаните и безбедноста на нивниот имот се над сè, сите ресурси во моментов се ставени на располагање во борбата со огнената стихија. Предвидената културно-уметничка програма во рамките на Фестивалот, ќе се одржи наредниот период.”
Во вакви променливи и крајно проблематични услови за реализација на манифестацијата со најдолга традиција во општината но и пошироко во регионот, се наметнува прашањето за нејзино адаптирање на постојните услови за нејзина реализација.
Дали е тоа возможно?

Духот на Голачки Фолклорни средби може да продолжи да живее и во вакви вонредни услови низ иновативни мултимедијални решенија, со користење на модерните трендови на комуникација и визуелизација, духот на Голачките фолклорни средби е можно да се приспособи за публика во денешни времиња, следејки ги модерните сценско-изведувачки практики апсолутно зачувувајки ја традицијата за да допре до својата публика.
Не смее како резултат на нечија неподготвеност за иновации и работа во областа на културата и традицијата согласно актуелните услови за раббота да биде оправдување за овој и редица други културни манифестации и настани од огромно значење за граѓаните на Делчево и пошироко да паднат во заборав!


