Денеска на прес конференција кандидатот за градоначалник на Делчево, Николчо Стојменовски од редовите на ВМРО-ДПМНЕ ги соопшти своите принципиелни заложби врз основа на кои ќе се раководи во наредниот 4 годишен мандат како градоначалник на Делчево.
Стојменовски ги истакна и своите главни проекти од предизборната програма која ќе биде претставена пред секој граѓанин на Делчево во наредниот период од предизборната кампања.
“-Имам искрена и јасна визија во наредните четири години Делчево да стане општина во која секое семејство ќе има квалитетна вода за пиење. Решен сум до секој дом да донесам квалитетна и модерна сообраќајница за нормален живот за сите! Делчево да биде препознатлива и посакувана туристичка дестинација. Знам како да обезбедиме подобра животна средина преку нулта толеранција за отпадот и лошиот амбиентален воздух. Ќе ја ослободам локалната самоуправа од дискриминација затоа што таа треба да биде сервис на сите граѓани. Граѓанскиот сектор и Бизнис заедницата ќе ја имаат целокупната моја поддршка, заедно да обезбедиме стандард на граѓаните кои навистина тоа го заслужуваат.
Во продолжение ќе набројам само мал дел од позначајните проекти. Делчево ќе го променимена подобро, на ниво на модерна Македонска општина:
– Ќе го промениме неуреденото централно градско подрачје. На реката Брегалница ќе го уредиме просторот во модерен урбан центар кој ќе биде средиште на идниот севкупен развој на општината Делчево. Ќе го уредиме коритото на река Брегалница, Ќе ги изградиме главните улици и тротоари во централното градско подрачје, со соответни места за паркинг;
– Сите села по приоритет ќе ги добијат основните услови за нормален живот: Водовод, канализација и улици;
– Секое село во Делчево да биде своевидна рурална развојна зона, во која земјоделците ќе можат да обезбедат подобра живеачка за себе и своите семејства, а нашите пазари ќе добијат квалитетен делчевски земјоделски производ;
– Досега многумина ветуваа воскреснување на нашата планинска убавица Голак. Конечно е дојдено времето заедно со мојот млад и посветен тим да го оствариме сонот Голак да стане главна туристичка атракција. Сето тоа во интерес на целокупниот локален економски развој на Делчево;
-Воедно со интензивна урбанизација преку ревизија на постојните и изработка на нови урбанистички планови ќе обезбедиме основи за идниот децениски развој на Делчево;
– Делчево ќе го сврти вниманието на домашната и меѓународна јавност со капиталните инвестиции во адреналинските спортови за нашите велосипедисти, планинари, моторџии и рели возачи;
-Конечно Делчево ќе добие нормален јавен превоз како на локално ниво така и во меѓуградскиот сообраќај;
-Имаме проекти за секоја населба, за секое населено место во Делчево кои ги ветуваме и за разлика од гарнитурата во заминување истите ќе ги реализираме!
Во периодот на претстојната кампања предизборната програма ќе ја донесеме во секој дом во Делчево, за сите делчевчани да можат внимателно да ја следат реализацијата на проектите кои во наредните 4 години во целост ќе го променат животот во Делчево на подобро.”
-соопшти Кандидатот за градоначалник на Делчево од редовите на ВМРО-ДПМНЕ Николчо Стојменовски.
