Обединети Македонци во чест на 11 октомври
Торонто, 10 октомври 2021:
По повод 80 годишнината на 11 октомври, Денот на востанието на македонскиот народ против фашистичките поробувачи во 1941 година, Организацијата Обединети Македонци (ООМК) оддаде почит пред споменикот „Во чест и вечна слава на паднатите борци за ослободување на Македонија“, кој нашата организација го подигна во 1979 година, во дворот пред македонската катедрала „Св. Климент Охридски“ во Торонто.
Претседателот и потпретседателот на ООМК, Драги Стојковски и Владе Гроздановски поставија венец во чест на паднатите борци, додека свештенослужителот Сашо Целески оддржа молитва за покој на душите за сите паднати жртви за ослободување на Македонија и македонскиот народ.По молитвите, присутните го продолжија чествувањето со прием во црковната сала. Секретарот на ООМК, Никола Делов, ги поздрави присутните и потсети на жртвите кои македонскиот народ ги даде со цел победа над германските, италијанските, бугарските и албанските нацисти и фашисти. Потоа, претседателот на „Обединети Македонци“, Драги Стојковски, се обрати до присутните со потсетување дека како што една напредна македонска елита во 1941 година го поведе македонскиот народ во борба за слобода, и сега треба напредната елита да го поведе македонскиот народ кон возобновување на АСНОМ-ска македонска република, но овој пат тоа ќе мора да биде на територијата на цела Македонија за истата да биде одржлива. Формалниот дел од приемот заврши со поздравот на Владе Димитриевски, претседател на црковната управа при МПЦ Св. Климент Охридски.
Организацијата Обединети Македонци во Канада е основана во 1959 година со цел Обединување на Македонците во нивната борба за етнички, јазични и културни права во Канада, како и ширум светот.
