На денешната собраниска седница, и покрај инсистирањето на пратениците на ВМРО-ДПМНЕ и коалицијата за ставање на точка на дневен ред на измените на Законот за Служба во АРМ кој го предложивме по ИТНА постапка, барањето беше одбиено од страна на Претседателот на Собранието. Изговорот беше дека не биле создадени услови за ставање на итниот закон на дневен ред. (се’ уште не бил преведен Законот).
Поради неспособноста на раководството на МО, во АРМ има две формации, односно има лица кои се поставени по нова и лица кои се поставени по стара формација. Лицата кои се поставени по стара формација и на нив системот не смета во иднина, не можат да заминат во пензија токму поради законски пречки за кои нудиме решение. Со предлог измените кои ги доставивме до Собранието, предлагаме:
– пензионирање со 40 години стаж за мажи и 38 за жени,
– лицата кои имаат 55 години, а немаат 40 години стаж, да имаат можност да останат на работа на нивно барање до стекнувањето на 40 години стаж,
– департизација на АРМ и враќање на ингеренциите на НГШ кои му беа одземени од страна на министерот Шекеринска во 2020 година во поглед на поставување на високи чинови во АРМ,
– порамнување на пензиите на поранешните припадници на АРМ,
– 1000 евра отпремнина за сите професионални војници кои навршиле 45 години старост за секоја година помината на служба.
Затворањето на оваа тема е клучна во овие услови на геополитичка состојба во светот и Македонија не смее да си дозволи да има отворени прашања во делот на одбраната.
Извор: Драган Ковачки- Пратеник на ВМРО-ДПМНЕ
