Само искрената емоција, која често е самиот живот, а не ретко и трнлива болка, може да претставува инспирација за создавање на совршена љубовна песна. Поради тоа, некои од најдобрите песни се напишани за врски и луѓе што навистина постоеле во реалноста.
Ewan MacColl – The First Time Ever I Saw Your Face
Иан МекКол за прв пат ѝ ја отпеал оваа песна на Пеги Сигер преку телефон, иако во тој период биле во низа на караници и проблеми и не им одело баш најдобро. Тие имале афера, бидејќи Иан тогаш бил оженет со друга, и поминале многу години за да конечно бидат заедно.
The Beatles – Something In The Way She Moves
Пети Бојд во нејзината автобиографија тврди дека нејзиниот сопруг Џорџ Харисон ѝ ја пеел оваа нежна љубовна химна во нивната кујна и на некој начин ѝ кажал дека ја имал напишано токму за неа. Но, Харисон тврди дека песната е посветена на богот Кришна. Тајната за мотивацијата на овој хит, ќе остане непозната.
Eric Clapton – Layla и Wonderful Tonight
Ерик Клептон се вљубил во Пети Бојд додека таа сѐ уште била во брак со Џорџ Харисон. Така настанала песната „Layla“ чиј наслов е преземен од една книга за забранета љубов. Кога веќе биле заедно, Ерик Клептон ѝ ја посветил и песната „Wonderful Tonight“ во која говори за тоа колку добро изгледала кога бирала кој фустан ќе го облече за вечерното излегување.
Nick Cave – Black Hair
Жената со коса длабока како мастило и црна како најдлабокото море е Пи Џеј Харви. Врската на Кејв со оваа кантавторка била кратка, но влијателна. Таа му послужила како инспирација и за песните „West Country Girl“ и „Green Eyes“.
Amy Winehouse – Back To Black
Ејми Вајнхаус ја напишала нејзината најпозната песна кога ја прекинала врската со Блејк Филдер. Во овој случај зборот „black“ (црно) од насловот се однесува на алкохолот, хероинот и депресијата во која западнала по тој настан.
Leonard Cohen – Marianne
Леонард Коен ја запознал Мариен Илен на грчките острови Хидра во 1960 година. Тој кажал дека таа била најубавата жена што некогаш ја запознал и набрзо станале љубовници. Нејзината слика се наоѓа на омотот за неговиот втор албум „Songs From A Room“, а таа е и главната тема во песната „Bird On The Wire“. Сепак, таа е најпозната по трогателната проштална песна од неговиот втор албум.
