Хипнозата е ментална состојба (теорија на свесна состојба) или видови на однесувања (теорија на несвесна состојба) најчесто поттикната со постапка позната како хипнотичка индукција, која обично се состои од серија на претходни инструкции и сугестии. Хипнотичките сугестии може да ги зададе хипнотизер во присуство на субјектот („хетеро-сугестија“), или може да бидат самоуправувани („само-сугестија“ или „автосугестија“). Примената на хипнотизам за терапевтски цели се нарекува „хипнотерапија“.
Зборовите „хипноза“ и „хипнотизам“ потекнуваат од поимот „невро-хипнотизам“ (нервно спиење) кој го создал шкотскиот лекар и хирург Џејмс Брајд околу 1841 година, за да направи разлика меѓу својата теорија и практика и оние кои ги развил Франц Антон Месмер и неговите следбеници („месмеризам“ или „животински магнетизам“).
Иако има популарно недоразбирање дека хипнозата е форма на несвест која што наликува на спиење, современите истражувања покажуваат дека таа е всушност будна состојба со фокусирано внимание и зголемена сугестивност, а со намалена свесност за околината. Во првата книга за субјектот, Неврипнологија од 1843 година, Брајд го опишува „хипнотизмот“ како состојба на физичко олабавување („нервно спиење“), придружено со и поттикнато од ментална концентрација („отсутност“).
За хипнозата е потребна љубопитност и отворено размислување. Додека некои луѓе веруваат дека не можат да бидат хипнотизирани, можеби вистината е сосема различна. Секој е подложен на хипноза, разликата е само времето што ви е потребно за да влезете во состојба на транс.
Всушност, луѓето влегуваат и излегуваат од состојбата на транс во текот на целиот ден. Дали некогаш сте читале книга и времето како да ви „летнало“? Дали некогаш сте возеле и сте сфатиле дека не помните кога сте поминале некое место? Вие сте мечтаеле, и ако во тој случај пред вашиот автомобил истрчал некој, вие сепак би застанале, иако не сте целосно свесни за вашето опкружување.
Како што се движите кон состојба на пониски мозочни бранови, можете да се почувствувате како да лебдите. Некои луѓе помнат сè што се случувало, додека кај други има заборавени периоди. И двете ситуации се во ред бидејќи секогаш има некој дел од вашата свест што слуша што се случува. Овој дел ги прави потребните промени во вашата потсвест. Оваа состојба може да биде многу релаксирачка. Често се губи смислата за време, па половина час може да ви изгледа како 5 минути.
Па, како да дознаете дали хипнозата ќе работи за вас? Овој едноставен тест ќе ви помогне во тоа. Прочитајте го целиот параграф пред да започнете со експериментот.
1. Седнете на тивко и удобно место и не ги прекрстувајте нозете. Вдишете длабоко неколку пати и обидете се да не мислите на денот. Скенирајте го вашето тело за да откриете каде има напнатост и обидете се да се ослободите од неа со дишење.
2. Испружете ги рацете напред во висина на рамената. Забележете дека се на иста висина пред вас. Затворете ги очите, вдишете длабоко неколку пати и бавно издишувајте.
3. Замислете си дека некој врзува балон со хелиум на едната ваша рака, додека става тешка книга во другата.
4. Замислете дека балонот ве крева нагоре, а книгата ве спушта надолу. Сега додајте уште еден балон и уште една книга. Замислете си како едната рака станува сè полесна, а другата сè потешка.
5. Продолжете да додавате книги и балони уште 3 пати. Сега отворете ги очите и погледнете ги рацете. Дали се на истата висина како на почетокот? Дали раката со балоните е повисоко?
6. Без разлика колкава е разликата во висината, ако навистина сте ги замислиле балоните и книгите, доволно сте љубопитни и со отворен ум за лесно да постигнете состојба на транс.
Хипнотизерот може да користи други техники за да го постигне ова. Сепак, за секој човек потребен е различен пристап. Најверојатно ќе почне со вовед, некој вид приказна што ќе ве опушти. Потоа може да користи одбројување или да ве замоли да замислите како се симнувате по скали. Во тој момент настануваат промените што сакате да ги направите. Хипнозата може да ви помогне во многу нешта:
- Да се чувствувате задоволни со помали порции кога јадете.
- Да останете смирени кога партнерот кажал или направил нешто лошо.
- Да ги надминете мислите за прескокнување на вежбањето.
- Да забележите кога сте под стрес и да се смирите.
- Да се чувствувате смирено и самоуверено кога разговарате со личност која ви се допаѓа или пред некоја презентација.
Без разлика која е вашата ситуација, ако можете да ја замислите целта додека сте опуштени, вашиот ум ќе се насочи кон тоа. Секојпат кога го правите ова, ќе станете подобри во визуализирање на посакуваните резултати. Промените што ќе ги забележите ќе ве охрабрат. Потребен е само отворен ум и можностите се бескрајни.
