Со оглед дека општинските изборни комисии ги објавуваат првичните резултати од изборите во рок од седум часа по завршувањето на изборите врз основа на податоците од избирачките одбори, рокот за поднесување на приговори за постапката за сумирање и утврдување на резултатите истекува ноќва во 2 часот по полноќ, соопшти Државната изборна комисија.
Подносителите на листи на кандидати имаат право да поднесат приговори до ДИК за постапката за гласање, сумирање и утврдување на резултатите во рок од 48 часа по завршувањето на гласањето, односно 48 часа по објавувањето на првичните резултати.
Приговорите за постапката за гласање можат да се поднесуваат најдоцна до денеска до 19 часот.
До Државната изборна комисија (ДИК) до 15:30 часот по еден приговор за постапката на гласање, сумирање и утврдување на резултати за првиот круг од локалните избори поднеле Алијансата за Албанците и ТМРО.
Според информациите од ДИК, Алијансата на Албанците во приговорот бара поништување на гласањето на едно избирачко место во Гостивар. ТМРО, пак, во приговорот бара поништување на гласањето на сите избирачки места во Град Скопје изразувајќи сомнеж во работата на изборната администрација.
До ДИК претходно беа поднесени 48 приговори од граѓани за заштита на избирачкото право. (МИА)
Извор: Курир
