На 15 декември со почеток во 10.00 часот во амфитеатарот бр. 40 на Факултетот за земјоделски науки и храна во Скопје ќе се одржи традиционалниот настан „Пчеларски ден – знаење и дружење 2020“ кој третира прашања поврзани со пчеларството.
На настанот свое забележително учество ќе имаат повеќе експерти од оваа област како од Македонија така и од странство.
Во продолжение ја пренесуваме поканата за настанот упатена до јавноста од страна на организаторите:
“Македонското здружение за заштита на автохтоната македонска медоносна пчела (Apis mellifera macedonica) го најавува настанот „Пчеларски ден – знаење и дружење 2020“. Настанот, кој MacBee веќе традиционално го организира неколку години наназад и овојпат ќе биде од едукативно – информативен и меѓународен карактер со учество на странски експерт од областа на пчеларството и со домашни стручни предавачи.
Главен презентер ќе биде гостинот од Австрија, г-ца Ана Пернер, професионален пчелар. Г-ца Пернер има долгогодишно искуство на пчеларење на семејната пчеларска фарма, која е една од најголемите производители на пчелни матици во Австрија. Таа е ангажирана и како секретар во Австриското здружение на одгледувачи на Крањска пчела (ACA).
Темата на која ќе презентира г-ца Пернер е „Наш начин на пчеларење“. “
