Имаме јасна и прецизна визија, знаеме и можеме да го подобриме животот во општина Босилово

Почитувани,

Граѓаните на општина Босилово заслужуваат да живеат во модерна и убава општина во која ќе бидат задоволени најголемиот дел од нивните потреби.

Имаме јасна и прецизна визија, знаеме и можеме да го подобриме животот во општина Босилово. Нудиме перспектива за подобар живот, нудиме достинство за секој еден жител на Босилово.

Јас и мојот тим силно ќе се залагаме за да обезбедиме подобар живот за нашите сограѓани преку изградба на квалитетна инфраструктура, подобро образование, заштита на животната средина, преку развој на спортскиот дух и урбанизација на општината. Тоа што го ветуваме, ќе си стоиме на зборот и ќе го исполниме.

Во продолжение ќе споменам само дел од проектите од мојата програма:

• Ќе започнеме со изградба на канализација во Босилово, Турново и Робово, а со тоа ќе започне и решавањето на еден од најбитните проблеми на жителите на општина Босилово.
• Реконструкција и доградба на Домот на Културата во село Иловица и завршување на реконструкцијата на Домот на Културата во село Секирник.
• Планирањето и уредувањето на просторот и урбанизацијата се едни од најголемите предизвици во руралните средини затоа ќе направиме урбанистичко планска документација за Босилово, Моноспитово, Дрвош, Бориево, Турново.
• Ќе го изградиме локалниот пат Бориево – Колешино, ќе започнеме со изградба на локалниот пат Иловица – Дрвош, а ќе направиме проектна документација за локалниот пат Штука – Сушица со што ќе придонесеме за подобра поврзаност на подогражденските населени места.
• Заради обезбедување подобри и поквалитетни просторни услови за одвивање на наставниот процес ќе ги реконструираме училишните згради „Кирил и Методиј“ с .Радово, „Кирил и Методиј“ с. Турново и „Гоце Делчев“ с. Еднокукево.
• Посебно внимание ќе обрнеме на изградба и асфалтирање на улиците. Предвидуваме изградба на над 30 улици во сите населени места во зависност од нивните големини и потреби.
• Особено внимание ќе обрнеме на животот на младата популација. Затоа ќе изградиме повеќенаменски игралишта во Моноспитово, Секирник, во Дрвош постоечкото ќе го оградиме и ќе го осветлиме, во Робово ќе направиме сосема ново одбојкарско игралиште.
• Ќе ги зголемиме капацитетите на јавното комунално претпријатие со набавка на нова механизација со цел да воведеме планско собирање на отпадот. Континуирано одржување и изградба на нови одводни канали.
• Со цел да го подобриме водоснабдувањето ќе ги доизградиме водоснабдителните системи во Иловица и Штука, а во населеното место Дрвош ќе направиме уште една бушотина и ќе зафатиме уште 3 извори.

Почитувани граѓани, Ве повикувам на 15-ти октомври да го искористите своето право на глас што ви е со закон загарантирано. Ве повикувам да гласате за број 13 за кандидатот за градоначалник од ВМРО-ДПМНЕ и за кандидатите за советници од ВМРО-ДПМНЕ и коалицијата „За подобра Македонија“. Со тоа гласате за работа, гласате за Македонија и гласате за посветла иднина на општина Босилово.