Во периодот од 8ми јули до 21ти јули 2018, Пелагонискиот Регион, а посебно Крушево ќе биде арена во која што ќе се натпреварува светската елита од 150 пилоти, а Република Македонија по втор пат ќе биде во фокусот на светската воздухопловна спортска јавност и домаќин на околу 200 учесници, пилоти и официјални гости кои што ќе престојуваат две недели во Крушево за време на натпреварите.
Стартните локации на натпреварот ќе бидат во Крушево на Мечкин Камен, а во регионот на Прилеп, с. Кривогаштани и регионот на Битола се предвидени местата за слетување и крај (цел) на трките.
Овие две големи првенства ја ставаат Македонија на мапата на најпосакувани дестинации за спортистите и љубителите на слободно летање од Европа и ширум светот. Тоа претставува одлична можност за промоција на нашата земја не само како туристичка, туку и како дестинација со одлични услови за слободно летање, особено за организирање на натпревари од висок ранг.
Крушево ве очекува!
