Хуманоста на граѓаните му овозможија на малиот Борјан Гигов од Скопје да ја продолжи битката за подобар живот. На шестгодишниот Борјан кој има комбинирани пречки во развојот му беа аплицирани матични клетки во болница во Истанбул, тој го помина првиот третман со кој имаше значително подобрување на неговата здравствена состојба.
Неговите родители ја информираат јавноста и сите оние кои продонеле за малиот Борјан да замине на лекување, и се заблагодаруваат на хуманите граѓани кои донирале за тој замине и на вториот третман.
„Кај Борјан извршен е и вториот третман, терминот што беше закажан на 25 -ти јули мораше да се одложи поради недоволни средства за на 5 -ти месецов. Така и се случи, на 4 -ти август заминавме за Истанбул, а на 5 -ти август беше извршен третманот и се помина во најдобар ред, матичните клетки од првиот третман веќе даваат добри резултати, сега и од вториот третман ќе очекуваме се надеваме уште подобри резултати, донациите за броевите се веќе завршени, останаа нешто срества со кои што за Борјан е земено терапија од болницата за наредните 3 месеци, во меѓувреме ќе бидеме во контакт со докторите од Истанбул како би знаеле како напредува нашето синче. Сакаме да искажеме голема благодарност до сите хумани луѓе кои овозможија нашиот син да добие шанса за подобар живот, за подобро детставо, исто така голема благодарност до вас како медиум кои што допринесовте да се прошири апелот за помош за Борјан“, напиша таткото на Борјан, Тале Гигов.
Претходно собраните средства не биле доволни за да се реализира планот за Борјан да замине на лекување во Германија, неговите родители добиле соодветна понуда од Liv Hospital во Истанбул, каде на момчето му се аплицирани матични клетки. Овој летен период треба да го означи и почетокот на подобрувањето на неговата здравствена состојба, за да може во септември и да седне во училишните клупи.
„Докторите велат дека со аплицирањето на матичните клети ќе се подобри се’ – комуникација, говор и однесување. Нема да биде агресивен и нервозен. Социјализацијата ќе биде подобро насочена, ќе знае да разговара со луѓето во своето опкружување“, раскажува мајката на Бојран.
Мајката вели дека од државата не добиле ниту денар и јавно им се заблагодарува на сите хумани граѓани:
„Немаме ниту денар од државата. Секаде поднесовме барање за да се помогне. Немаме никакви одговори, а во Фондот за здравство ни кажаа дека ако Детска клиника даде конзилијарно мислење ќе покријат, но тука не се дава мислење за ваков случај бидејќи матичните клетки не се фондовски покриени“.
Иако Борјан ќе биде првооделенец од новата учебна година, тој требало да тргне на училиште уште лани, но семејството решило тоа да го пролонгира. Сакајќи да се вклучи во редовната настава, тие сега аплциирале и за да му биде обезбеден асистент.
Според родителите на Борјан, свеста кај граѓаните за инклузијата на деца со пречки во развојот, се зголемува.
„Повеќето луѓе се запознаваат веќе со овој проблем, се зголемува свеста, се прифаќаат децата со аутизам. Немав одбивност во градинката каде што оди Борјан. Имав од таму помош колку што можеа, ама сепак граѓаните почнуваат веќе да ја разбираат проблематиката. Инклузијата во училиштата е таква каква што е, но родителите се ставаат на наше место. Последната завршна приредба во градинката беше идеална, беше прекрасна. Не можам да речам дека нема помош“, додава мајката.
Таа и нејзиниот сопруг претходните пет години ги поминале во изнаоѓање начини за тоа како да му помогнат на својот син. Велат, финансиската состојба не им дозволува третманите да ги платат сами.
- Пишува ММС
