Дводневниот планински фестивал Osogovo Adventure организиран од Друштвото за спорт и рекреација Прв до врв, заедно со спортските љубители на адреналинот од Осоговието и велосипедската група МТБ Исток од Кочани го одржаа второто издание на планинската велосипедска тура на Осоговските планини.
Настанот Osogovo Adventure е велосипедско-планински фестивал составен од тури за планински велосипедисти и планинари со старт на Пониква, на Осоговските Планини. За учесниците се предвидени лесна и потешка тура, сопоред физичката подготвеност на поединците. Големата тура е со должина од 48 км, а малата – 38 км, на релацијата Пониква – Лисо Брдо – Крушка – Царев Врв – Пониква.
Покрај турите, овозможено е кампување, забавна музичко-фолклорна програма како и дегустација на зготвени традиционални јадења. Настанот има дополнителна цел да ги разбуди туристичките потенцијали на овој крај, кој би можел во поголемиот дел од годината да биде домаќин на љубителите на активниот одмор и туризам.
