Денеска (23 декември) се навршуваат 114 години од смртта на војводата Александар Сано Китанов кој што загинува во нерамноправна херојска борба рамо до рамо со Даме Груев кај врвот Петлец на Малешевските планини.
Овие фотографии во продолжение говорат за состојбата на родната куќа на војводата Сандо Китанов која што се наоѓа во денешно село Лешко во Благоевград (некогашна Горна Џумаја).
Оваа куќа декларативно е прогласена за национално културно наследство од страна на бугарските власти а нивната целосна негрижа за нејзината состојба и зачувување допринела за распад на овој бележит културен споменик за значаен револуционерен деец каков што е Сандо Китанов од илинденскиот период.
АЛЕКСАНДАР – САНДО КИТАНОВ, е македонски војвода роден 1881 година во селото Лешко, Горна Џумаја (денес Благоевград), Пиринска Македонија.
Во редовите на ВМРО стапува уште како ученик, а подоцна станува член на комитетот на ВМРО во Горна Џумаја.
Во 1901 заедно со Јане Сандански учествува во аферата Мис Стон како комита во четата на Христо Чернопеев. Подоцна бил комита и во четата на Гоце Делчев.
По Илинденското востание станува околиски војвода во Малешевијата и Кукушко.
На 23 декември 1906 година, во битка со турскиот аскер, заедно со Даме Груев и уште двајца комити загинува на врвот Петлец, во близината на селото Русиново, Беровско.
Сандо Китанов до крај остана верен на македонските идеали, и непоколеблив следбеник на делото на Сандански, Гоце Делчев и Даме Груев.
