Благој Бочварски од денес официјално ја превзеде функцијата градоначалник на Општина Штип. Во својата прва изјава за медиумите како градоначалник тој изјави:
„Од овој момент влегов во кабинетот на градоначалниот на Општина Штип, ја превземам функцијата, со што од денес и официјално ќе ја обавувам функцијата градоначалник на Општина Штип. Верувам во успешна соработка со целата администрација во општината и со сите јавни претпријатија. Верувам во успешна соработка со медиумите и со сите граѓани на нашиот град и затоа сум убеден дека нашиот град конечно ќе тргне напред. Имаме големи убави проекти за нашиот град и сите заедно со дополнителни нови идеи ќе ја зголемуваме, продлабочуваме нашата соработка и програма, за да на крај после четири години бидеме горди за сето она што ќе го направиме за нашиот град“.
На примопредавањето на функцијата не се појави претходниот градоначалник Илчо Захариев. На прашањето како го коментира овој потег Бочварски изјави:
„Во цела Македонија се случува примопредавање на демократски начин меѓутоа кај нас ова не е случај. Ќе беше добро да беше присутен и претходниот градоначалник со цел да размениме мислење. Да бидам запознаен со сите актуелни ситуации во општината, со состојбите на сметката, со сите состојби во јавните претпријатија и во администрацијата и ќе беше важно тие информации да ги добијам од прва рака. Но. доколку е таа одлуката на претходниот градоначалник јас не можам ништо повеќе околу таа работа, овде сум со шефот на кабинетот и веднаш после овој настан ќе ги повикам сите раководители на сектори да се видам со нив и директорите на јавните претпријатија да ме запознаат тие со сотојбите во општината за да можеме брзо да стартуваме. Бидејќи има многу проблеми, дел од проблемите веќе ги знаеме, јавното претпријатие Исар не може да земе плата, нема доволно пари на сметката а веќе поминуваат роковите за да се земе плата за минатиот месец“
Бочварски истакна дека се надева на сорабтока со актуелните директори на сите институции бидејќи тие сите заеднички треба да работат во интерес на граѓаните.
