Дополнителниот заменик министер за земјоделие, шумарство и водостопанство Цветан Трипуновски ја алармираше јавноста за негативните процеси кои се случуваат во ЈАвното претпријатие Македонски шуми.
Како што информира Трипуновски, станува збор за неисплатени плати и придонеси за околу 3000 вработени во претпријатието кои мака мачат во овие денови на покачени трошоци и општ хаос во кој што се наоѓа државата поради пандемијата со корона вирусот.
Во продолжение во целост го пренесуваме соопштението на Цветан Трипуновски во врска со овој проблем:
“Околу 3000 вработени во ЈП Македонски Шуми, два месеци се без плата и платени придонеси за пензиско и здравствено осигурување. Тоа се речеси 3000 семејства на кои им е загрозена егзистенцијата. Во ек на светска пандемија, покачени трошоци за живот и општ хаос 3000 наши сограѓани се соочуваат со мака како да го преживеат месецот, тоа се луѓе со кредити, со разни други давачки, на некој од нив ова им е единствен приход за живеачка.
Да не се исплати плата за два месеци е крајно неодговонорно, нехумано и недомаќинско работење од страна на менаџерскиот тим на ЈП Македонски Шуми.
Каде се парите за плата на овие луѓе!? Доколку нема зошто се примаат нови и се штанцаат нови огласи за партиски вработувања!? Доколку има, каде завршиле и зошто не им се исплатени на работниците!?
3000 семејства не смее да останат без егзистенција. Платите на вработените во ЈП Македонски Шуми мора да се исплатат.”


