По повод 5-ти Октомври- Светскиот ден на наставниците, Комисијата за образование која што работи во рамки на Општинскиот комитет на ВМРО-ДПМНЕ во Кочани одржа јавна трибина во која се разговараше за значењето на образованието во модерните општествени околности во општината, поширокиот регион и државата.
По завршувањето на трибината од ОК на ВМРО-ДПМНЕ од Кочани на своја прес конференција го честитаа денот на наставниците и потсетија повторно за значењето на овој ден.
Во продолжение го пренесуваме интегралниот текст од нивната прес конференција:
Петти октомври е Светски ден на наставниците. Се одржува секоја година од 1994, одбележувајќи ја годишнината од усвојувањето на препораката на УНЕСКО, дадена во уште во 1966 година. Во Интернационалата за образование членуваат 166 земји и 22 милиони просветни работници. Во Република Македонија околу 30.000 вработени во образованието, го одбележуваат веќе 25 години.
Препораката на УНЕСКО се однесува на правата и обврските на наставниците, како и на стандардите кои опфаќаат нивно вработување, подготовка и професионално усовршување, но исто така се однесува и на условите на држење на настава.
Професијата “наставник” е предизвик кој носи одговорност, притисоци и проблеми. Нерешениот статус на дел од наставниците, како и дополнителниот административен ангажман ги оддалечува просветните работници од примарната воспитно-образовна задача.
Реформите во образованието беа направени и продолжуваат да се прават без сериозни консултации со стручната јавност.
Наставникот треба да биде пример за учениците, но и да е соодветно ценет и платен за вложениот труд. А во Република Македонија, платата во образованието е далеку под просечната.
Мотo на годинешното одбележување на Светскиот ден на наставниците ќе биде “Младите наставници – иднината на професијата”, а кај нас ?
Нека е честит Светскиот ден на наставниците !
