Денеска на конститутивната седница на Советот на општина Штип, падна “Северна”.
Во образецот на Свечената изјава која што новоизбраните советници требаше да ја потпишат на оваа конститутивна седница, кој им бил доставен од страна на општинските служби стоело името Република Македонија без придавката “Северна.” Ваквата ситуација советникот Душко Иванов од сега веќе владеачкото советничко мнозинство на ВМРО-ДПМНЕ и коалицијата “Обнова за Македонија” на седницата ја образложи со фактот што Законот за локална самоуправа каде е девинирана постапката за давање Свечена изјава го содржи токму овој образец кој што денес им бил поделен на советниците да го потпишат.
Советничката од СДСМ Маријана Рогожарска-Поповска, притоа пред советниците истакна дека не треба да се оди против Уставот и побара правно толкување од службите, за ваквата состојба. Предлогот на Рогожарска беше одбиен, по што советниците на СДСМ ја напуштија седницата. Свечена изјава во новоконституираниот совет на општина Штип дадоа 13 советници на ВМРО-ДПМНЕ и коалицијата како и еден советник од партијата Левица во која што стоеше името Република Македонија.
На оваа конститутивна седница за Претседавач на општинскиот совет на општина Штип беше избрана Весна Карагунова-Кожинкова од ВМРО-ДПМНЕ и коалицијата “Обнова за МАкедонија”.
