Од осамостојувањето па речиси до ден денешен Штип секогаш е давал свои високи претставници во извршната и законодавната власт, независно која партија е била на позиција на власт. Во многу наврати до сега Штип даваше свои личности на позициите премиер, претседател или министер кои оставија свој белег во македонската политика.
Промените на централната и локалната власт како да предизвикаа и промени во оваа традиција. Штип до пред одржувањето на локалните избори во собранието од позиција на власт беше претставуван од Благој Бочварски инаку актуелен потпретседател на СДСМ. Меѓутоа, по победата на Бочварски на локалните избори Штип остана без свој претставник во парламентарното мнозинство во собранието. Местото на Бочварски ќе го завземе следниот кандидат од пратеничката листа на СДСМ но тој не доаѓа од Штип.
Покрај тоа што сега веќе Штип нема да има пратеник во собранието од редовите на партијата која е на власт, Штип и штипјани не добија до сега ниту едно раководно место од првиот и вториот ешалон т.е Штип не доби свој кадар на позициите минситер, заменик министер или директор на некоја од поголемите и позначајни државни институции.
Како дојде до ваквата ситуација Штип да остане кадровски занемарен можеби ќе треба да се побара одговор од функциониерите од партијата која сега е на власт. Со ваквата слаба кадровска застапеност во власта останува отворено прашањето дали Штип ќе остане занемарен и во својот развој или пак новите власти имаат поинаква стратегија за развој на овој град. Во секој случај сега останува само на двајцата опозициски пратеници во собранието да се борат за интересите на Штип и штипјани се до некоја идна промена на позициите.
