Во организација на ПСК “Осогово” Кочани во недела 8-ми Јули ќе се одржи 11-тиот традиционален планинарски петровденски планинарски марш во чест на денот на градот Кочани.
За првпат овој марш ќе се реализира кон локалитет Раткова скала кој се наоѓа на 1250 метри надморска висина. Стартот на маршот ќе биде од селото Пантелеј кое се наоѓа на 12 км. од градот Кочани и до него води асфалтиран пат и се стигнува за 20 минути.
Должината на патеката во еден правец изнесува 10,5 километри и се стигнува за околу 3 часа.
Ова воедно ќе биде промоција на новата планинарска патека која во изминатиот период беше исчистена, трасирана и маркирана со повеќе знаци и патокази. Според номенклатурата на планинарски патеки спаѓа во категоријата на средно тешки патеки, која е поволна за сите љубители на рекреативното пешачење.
Самиот локалитет Раткова Скала кој е единствен од ваков вид на Осоговските Планини, со својата грандиозност нуди пејсажи од кои застанува здивот.
Од самата Раткова Скала се шири извонреден видик кон Кочанската котлина.
(Легендата за овој локалитет вели дека во многуте пештери во таа скала имало орлови гнезда каде се изведувале мали орли, а во некои имало пчели. Се претпоставувало дека таму биле закопани и многу богатства од античко време. Мештаните од тој крај раскажувале дека оваа скала го добила името по некој Ратко кој често се качувал во пештерите да вади мед. Секој ден останувал се подолго и подолго. Тие го предупредувале да не јаде многу мед, за да не му се слоши. Му викале: – Јади, јади Ратко додека ти е слатко! Еднаш прејал, па му се слошило и паднал во провалијата, од височина од околу 300 м. По него останало името Раткова скала.)
-соопштиваат организаторите ПСД “Осогово” Кочани.
Маршот започнува кај Манастирот Св.Пантелејмон, село Пантелеј, со почеток во 07.00 часот.
За сите учесници организаторот има обезбедено планинарски ручек во манастирскиот комплекс.
Секој учесник е потребно да си донесе прибор за јадење.
Клубот има обезбедено превоз од Кочани до с.Пантелеј за сите оние кои ќе немаат превоз а поаѓање од градскиот плоштад во Кочани ќе биде во 06.00 часот.
Лица за контакт:
Тошо Антов 078-270-724 Методи Георгиев 078-203-047 Мирче Ефремов 078-389-909
