Одговарајќи на пратеничко прашање што треба да се менува во македонските учебници, Зоран Заев, во само нему својствен стил, одговори дека во некои учебници постојат формулации како што е „бугарски фашистички куршум“ што, според него, не било во духот на пријателството, нешто што не е спорно, бидејќи навистина нема ништо пријателски во бугарски, или во било чиј фашистички куршум.
Само што изуми да каже во што е непријателскиот гест:
(а) во тоа што во учебниците се спомнува бугарски фашистички куршум или (
б) во тоа што стварно постоел бугарски фашистички куршум, од кој загинале многу Македонци и други жители во Македонија, како што и многумина, без било каква милост, биле обесени по бугарските фашистички затвори.
Наедно, заборави да каже кој кому треба да се извинува и кој треба да ги менува своите учебници. Конечно, Заев треба да има предвид дека Царска Бугарија (како дел од фашистичката оска) објавила војна на САД и на Велика Британија кои, во секој случај, не биле дел од фашистичката оска и кои, токму затоа, со својата авијација ја бомбардирале оваа земја. Исто така, СССР воено навлегол во Царска Бугарија како во фашистичка земја. Или, можеби, и овие земји ќе треба да ги менуваат учебниците по историја, во согласност со пријателските намери?
