По повод 11 Октомври- Денот на народното востание против фашистичките окупатори во Втората Светска Војна, делегација на Општинскиот Комитет на ВМРО-ДПМНЕ Делчево предводена од Претседателот Иван Гоцевски пред Споменикот на паднатите борци од НОВ 1941-1944 година во центарот на Делчево положија букет свежо цвеке.
Притоа од ОК на ВМРО-ДПМНЕ Делчево во јавноста упатија своја порака за обединување на сите Македонци зад идеалите на борците од НОБ за напредна Македонија.
“Нека Ни е честит 11 Октомври!!!
Вооруженото востание против фашистичкиот окупатор, започнато на 11 Октомври 1941 година, ни ја донесе слободата и остварувањето на сонот за формирање на Македонска држава. Патот до конечната победа преку долготрајната Народноослободителна борба, исполнет со страдање и хероизам ни обезбеди место на страната на правдата и на човечноста.
Борбата за слобода зеде многу жртви, пред кои ние денес се поклонуваме, и чие дело го славиме.
Затоа денес, 11 Октомври е повеќе од државен празник, тој е и отелотворување на идеалот за слобода и правда.
Никој нема право, а најмалку тие кои ја водат државата, да внесуваат сомнежи, поделби или да прават трговија со нашата колективна заслуга во борбата против фашизмот.
Во време кога повторно слободата ни се ограничува, кога се прават поделби, кога нема одговорност за никого и ништо, кога книгите завршуваат во депонија, кога луѓето не чувствуваат сигурност, кога со нашето наследство власта прави трговија, а здравството стана капела, повеќе од сигурно е дека не сме достојни за овој голем ден. Партизаните, нашите втори илинденци залудно не газеа по снеговите, не се бореа и гинеа за слободата за да денес прелесно допуштаме поигрување со таквото наследство, врежано во колективната меморија на слободарските антифашистички народи во светот, на чие наследство како Македонија имаме полно право да се повикуваме.
Од името на Претседателот на ОК на ВМРО-ДПМНЕ , Делчево – Иван Гоцевски, Од името на членовите на ОК на ВМРО – ДПМНЕ, Делчево:
– Посакуваме обединети и сплотени, да го продолжиме стремежот на борците од НОБ за просперитетна Република Македонија, приклучувајќи се како рамноправна држава во обединета Европа, Европа во која ќе нема мали и големи, позначајни и помалку вредни, Европа базирана на рамноправност, еднаквост и солидарност, Европа ‒ лулка на демократијата .
Да живее споменот за 11 Октомври и Република Македонија.”
