Дафина Стојаноска, член на ИК на ВМРО-ДПМНЕ денеска на прес конференција го изнесе партискиот став во врска се позагрижувачката состојба во државата поврзана со ширењето на Корона вирусот, за одговорноста на Венко Филипче како и предлог мерки кои под итно треба да ги превземат надлежните институции во најкус можен период.
Во продолжение во целост ја пренесуваме прес конференцијата на Дафина Стојаноска:
“Неспособноста на Венко Филипче и владата се плаќа со здравјето на граѓаните. Доцната реакција на надлежните институции резултираше со голем број на лица кои се во изолација. Меѓу нив се и лекари.
Мерките со кои секојдневно се фалеше Филипче на прес конференции се покажа дека се фарса и дека се спроведуваат половично.
Прво, нема соодветна контрола на граничните премини и на двата аеродрома за рано предупредување за заболени од корона вирусот. Ако имаше, тогаш немаше вирусот да се шири секојдневно и тоа од луѓе кои допатувале од кризните држави зафатени со епидемија на корона вирусот.
Второ, недозволиво е што директорката на Клиниката за дерматологија се однесувала неодговорно. По откривањето на постоењето на вирусот според наши сознанија направен е обид за премолчување на вистината и притисок да не се дознае во јавноста, што е навистина скандалозно. Со несовесно однесување, по направени серија на пропусти Венко Филипче го загрозува здравјето на граѓаните.
ВМРО-ДПМНЕ ќе поднесе и кривична пријава до надлежното обвинителство за загрозување на здравјето на граѓаните. Потребна е одговорност и поднесување на оставка.
Владата заедно со стручните колеги од министерството да ги преземе следните мерки:
-Распуст за децата од предучилишна и училишна возраст,
-Строго евидентирање на сите лица кои влегуваат во државава од кризни зони со корона вирус,
-Контрола и ограничување на прегледите и интервенциите кои не се со итност со цел да се растерети терциерното здравство и да биде подготвено да одговори на ситуацијата како и да се заштитат пациентите и медицинските лица,
-Надлежните институции, Центарот за управување со кризи, Државниот здравствен санитарен инспекторат, Комисијата за заразни болести да ги спроведуваат доследно своите надлежности и јавно да претстават акциски планови за делување.
Дилетантскиот пристап на Филипче го загрози здравјето на граѓаните. Потребни се мерки кои ќе дадат резултати.”


