Од општинскиот комитет на ВМРО-ДПМНЕ денеска излегоа со прес конференција во која ги разобличија “обидите на СДСМ да ги мобилизира под присила вработените под локалните и државните институции во Куманово, за присуство на трибина во Домот на културата за исполнување на партиската агенда на Зоран Заев “.
Претседателот на Општинскиот Комитет на ВМРО-ДПМНЕ од Куманово, Бране Петрушевски упати остра критика кон целата организација на самиот настан дека служи единствено за исполнување на агендата на Зоран Заев за промена на идентитетот на Македонскиот народ со злоупотреба на државни објекти и ресурси.
Во продолжение во целост го пренесуваме обраќањето на Бране Петрушевски од денешната прес конференција:
Вчера уште еднаш, по којзнае кој пат, СДСМ на дело покажа дека Куманово е заробен град. Вчера, под високи притисоци, СДСМ направи обид да ја мобилизира целата локална и државна администрација во Куманово, за присуство на трибина во Домот на Културата, терајќи строго партиска агенда. Оваа трибина организирана од ОО на СДСМ Куманово во државен објект, на која 15-минутно излагање имаше министерот за надворешни работи Никола Димитров, требаше да послужи за оправдување на срамниот и капитулантски договор со Грција.
Освен релативно слабиот одзив на уценетата и притисната локална и државна администрација, на трибината поддршка не дадоа кумановци, кои со тоа јасно ставија до знаење дека срамниот договор со Грција значи бришење на Република Македонија, бришење на македонскиот идентитет, македонската традиција, култура и историја.
Пораката на кумановци е јасна, тие никогаш нема да прифатат или поддржат распродавање на националните интереси како параван за прикривање на криминалот во кој се впуштени Заев и неговите соработници. Куманово никогаш нема да поддржи криминални тендери и злоупотреби на народните пари. Граѓаните на Куманово не даваат поддршка на политичари кои го лажат и го делат народот.
Интерес на најголемиот број на кумановци е Република Македонија интегрирана во ЕУ и НАТО, каде може да не внесат само политичари кои поседуваат и практикуваат европски вредности.
Г-динот Димитров во своето 15 минутно излагање пред кумановци не кажа ниту збор за последиците од штетниот и капитулантски договор со Грција, обидувајќи се тие штетни последици да ги задскрие елаборирајќи за европски вредности.
Но заборави да објасни дека не е европска вредност доделување на милионски тендери на фирми кои се формирани една недела пред да го добијат тендерот; не е европска вредност делењето на милиони од Фондот за инфонации на партиски функционери и послушници на СДСМ; не е европска вредност катастрофалната состојба во здравството каде секој ден има нов смртен случај; не е европска вредност негрижата кон земјоделците кои мака мачат со откупот; не е европска вредност игнорирањето на интересите на младите и партиските вработувања кои овие месеци се случуваат; не е европска вредност узурпацијата на општинскиот имот од страна на СДСМ и издавање на истиот под кирија на правни субјекти.
Освен постојаното говорење за ЕУ, преку што се обидуваат да ги покријат сите не европски, штетни и криминални политики, во оваа власт нема ништо европско. Практикуваат политики кои не носат раст и напредок, кои не обезбедуваат економски раст и развој и кои не се во интерес на граѓаните.
Токму затоа кумановци вчера испратија јасна и недвосмислена порака дека не ја поддржуваат оваа гарнитура на власт и дека Заев, Димитров и СДСМ не може да не однесат во ЕУ, затоа што ниту работат според принципите на ЕУ, ниту ги делат вистинските европски вредности.
