ПО ПРОТЕСТОТ ВО БОСИЛОВО
Почитувани граѓани, Ви благодариме за поддршката што ја покажавте вчера во Босилово на протестниот марш против рудникот на смртта во организација на Младите од Иловица и Штука. Исто така им благодариме на сите активисти што беа присутни на протестот, на Еко Долина, на сите организации од Југоистокот, на гостите од другите градови, локалните фирми, поедници од дијаспората, медиумите и сите што придонесоа на некаков начин но од објективни причини не беа во можност да присуствуваат. Во таа смисла посебно сакаме да го истакенеме придонесот од нашите луѓе од Пјаченца што несебично издвоија финансиски средства за организацијата на настанот. Сепак најбитно што сакаме да го потенцираме е масовното и видливо учество на младите луѓе што му дадоа посебен белег на овој настан но и како своевидна заложба за иднината. Сите заедно сме посилни!
Протестот беше успешен и според повеќе објективни извори имаше повеќе од 1200 граѓани кои се одважија да се појават и јасно да го искажат своето став во врска со рудникот Иловица-Штука. Сите заеднички испратија порака дека не го сакаат опасниот рудник во нашата котлина и дека отпорот ќе продолжи да расте до конечното одземање на незаконската и истечена концесија на Еуромакс. Испратија и силна порака до сите политичари да бидат на чисто дека руднички проект нема да помине и дека секое решение што би било спротивно на јасно изразената воља на граѓаните ќе предизвика силни реперкусии. Во таа смисла решение мора да има што побрзо зошто секое одоловлекување причинува дополнителен револт и сомнежи во оваа матна работа.
Од друга страна Еуромакс во меѓувреме побара делумен стечај, но и доби позајмица од 1 милион долари за да може тековно да работи. Но какви се тие тековни работи и за што потрошија 4 милиони долари за една година кога операции немаат, работници немаат, завршени им се студиите во 2016 година и реално немаат нешто посебно значајно што ги оправдува трошење на толкави средства. Белки не потрошија толку пари за три мали свадби со пирошки, кашкавали, салами и пиво? Еден политичар пред неколку дена јавно спомна дека Иловица мириса на пари и корупција. Веројатно не е далеку од вистината.
Директно им порачуваме на Еуромакс да си ги соберат парталите и да си одат од тука со добро. Џабе трошат позајмени пари на мортадела, ПР и таканаречено “лобирање” со кеш. Еуромакс може да избере да изигрува слеп, глув, недоветен, неразбран но тоа никако нема нема да ги спаси. Напротив, изминува времето и се повеќе се појавуваат групи граѓани кои се изразено револтирани па дури и непријателски расположени кон нив и нивните проѕирни лаги. Отпорот секојдневно расте со масовност и тензичност. Треба да се свесни дека влегоа на минско поле и дека многу лесно можат да детонираат масовен изблик на граѓански револт. Потоа ниту политичарите нема да можат да ги спасат.
Во следниот период ќе следуваат повеќе акции и настани за што сите ќе бидат благовремено известени.
Никогаш, за никого, по ниту една цена, нема да дозволиме рудник над Иловица и Штука!
Нека биде јасно за сите, никогаш нема да се откажеме и за нас нема назад!
СТОП ЗА РУДНИКОТ НА СМРТТА ИЛОВИЦА-ШТУКА
