Веќе стана традиција за Божиќ да се возобновува по некоја стара и подзаборавена православна Божиќна песна секоја година пред празнувањето на Големиот Православен празник.
Најодговорни за ваквата убава традиција се членовите на Здружението „Бадникови поворки“ кое што како главна програмска определба е да допринесат за што подостојно одбележување на денот на Христовото раѓање.
Станува збор за традиционална православна песна од нашето традиционално богатство кое што потекнува од Смирна. Ја пееле повозрасните луѓе за да ја соопштат веста за Христовото раѓање на Бадник, поручек-вечерта.
-соопштува Оливер Јосифовски од групата Љубојна на која и припадна честа оваа година да ја направи преработката на оваа песна.
„Христос се роди денес“ е насловот на овогодишната божиќна песна која “Љубојна” ја работат со членовите на одделот за традиционална музика при ДМБУЦ „Илија Николовски – Луј“ во Скопје.
Оваа песна се надополнува со претходните две песни кои беа адаптирани во претходните години за ваквата пригода. Најпрво децата од рано наутро со песната „Вечниот Бог“ или „Дева денес“ оделе од куќа на куќа и го најавувале Христовото Раѓање, за попладне тоа да го направат возрасните, токму со оваа песна „Христос се роди денес“.
“За мене, оваа е втора година по ред, како сум дел од Бадниковите поворки, и втора година како заедно со целиот мој православен народ, свечено и достоинствено, низ цела манифестација на настани, се подготвуваме да го празнуваме „Христовото Раѓање – Божиќ. Особено сум почестена што токму јас како бренд на Љубојна и една поголема група прекрасни луѓе од традицискиот оддел при ДМБУЦ „Илија Николовски Луј“, го добивме благословот на отец Партениј од манастирот Св.Јован Бигорски, со чија што љубов и посебно чувство на естетика, се сплотивме и ја возобновивме оваа четврта каланда или коледарска песна која ќе остане за навек, а носи наслов „Христос се роди денес“”
-вели Вера Милошевска – „Љубојна“
