Универзитетот „Гоце Делчев“ – Штип во соработка со Локалната самоуправа во градот ќе постави мерна станица за мерење на квалитетот на воздухот, со што граѓаните на Штип преку софтверско решение ќе може во секој момент на интернет да ги имаат актуелните вредности на квалитетот на воздухот, споредбено со законски дозволените граници на загаденост.
„Во рамките на досегашните истражувања кои ги врши нашата лабораторија за анализа на квалитет на воздух АМБИКОМ, започнуваме со една активност, со која треба да поставиме наши инструменти, инструменти кои целосно се конструирани и склопени во Македонија, и кои треба да овозможат поекономично и поефикасно мерење на квалитетот на воздухот. Ние повеќе од година работиме на овие конструкции, да ги провериме, да го поддржиме со соодветни софтверски решенија, и конечно сето тоа е при крај благодарение на помошта на индустријата, која ги бараше, и ние успеавме да склопиме инструменти кои сега ќе почнеме да ги поставуваме во оние локални самоуправи, во оние градови каде нема мрежа за мерење на квалитетот на воздухот. Почнуваме од Штип, бидејќи тука сме стационирани и со нив ќе овозможиме следење на податоците во реално време, значи се собираат податоците, кои се ставаат во база, која подоцна соодветно на потребите може да се користи. Тие податоци со софтвер ќе бидат достапни и на поедноставен и поефикасен, но пред се поразбирлив начин ќе презентира квалитетот на воздухот на јавноста. Преку тој софтвер кој се подготвува, ќе можат сите на интернет да ги види тие податоци. Инструментот користи најреномирани сензори, има вградено соодветен компјутер за поддршка на прибирање на податоци кои се трансферираат до наш сервер. Во овој инструмент кој ќе биде поставен и метеоролошки сензори, бидејќи на квалитетот на воздухот секако влијаат и метеоролошките услови“ – изјави проректорот за развој проф. д-р Дејан Мираковски.
По Штип, УГД вакви мерни станици ќе постави и во други градови во Р.Македонија, со цел граѓаните подобро да бидат информирани и да разберат каков е квалитетот на воздухот.
