Изложбата на етнолошки предмети, која е дел од проектите на Министерството за култура на РМ е отворена во Музејот на град Неготино.
Предметите кои што се изложени во изложбениот салон во музејот потекнуваат од почетокот на 18 до крајот на 20 век и се од селата од општина Неготино и тоа: Долни Дисан, Горни Дисан, Тремник, Војшанци, Бистренци, Тимјаник, Црвени Брегови, Курија, Пепелиште и од градот Неготино.
Собирани и класифицирани се по пат на подарување, наоѓање и откуп при теренските истражувања на етнолошкото одделение во ОУ Музеј на град Неготино од 1996 г. па наваму. Збирот и изборот за изложбата е направен врз основа на материјалите од кои што се изработени предметите, во првиот дел се содржани предмети изработени од керамика ( грнчарски предмети), потоа метални предмети, предмети изработени од дрво и текстил изработен и исткаен на разбој.
Најголемо љубопитство примамуваат предметите како што се: макази – крклизи, соларник, пиралка, дрмон, вретена, фурки, народниот вез и други предмети кои што се употребувале како алатки за извршување на земјоделски работи, во домаќинството, алатки за обработка и изработка на текстил изработени од вештите раце на грнчарите, казанџиите и ткајачките украсени со посебна орнаментика и колорит.
Сите предмети се во сопственост на ОУ Музеј на град Неготино, како збирка на етнолошки предмети со решение од Управата за заштита на културното наследство на РМ. Изложбата е од јавен карактер, ќе биде поставена до 28 јуни и може секој љубител да ја посети и види.
