Членот на Извршниот комитет на ВМРО-ДПМНЕ Драган Ковачки преку своја реакција упатена во јавноста ги коментира штетните политики на надлежните власти (Шеќеринска и Пендаровски) во корелација на односите на Македонските институции со НАТО партнерите и Евро-Атланскиот совет на НАТО.
Според Драган Ковачки кој што важи за еден од врвните експерти од областа на одбраната и воените науки не само во МАкедонија, недозволиво е Македонија две ипол години да нема свој политички претставник во НАТО Алијансата, наспроти сите декларативни определби на функционерите на СДСМ вгнездени во најзначајните ресори од каде евидентни се неспособноста и деориентираноста на политичкото нивно делување.
Во продолжение интегрално го пренесуваме коментарот на Полковникот Драган Ковачки во врска со оваа особено важна тема за севкупните состојби во државата:
“Според еден од медиумите, предлогот на МО-Шекеринска и ПРМ-Пендаровски за наш претставник во НАТО, веќе бил одбиен од НАТО, односно одреденото лице било непожелно во командата во Брисел.
Поврзано за овој скандал, не сакајќи да навлегувам во личните квалитети и квалификации на одредениот претставник, само ќе констатирам факти и ќе поставам неколку прашања од јавен интерес.
1. Уште во февруари 2019 година, поранешниот претседател на државата, со Указ постави македонски претставник во НАТО, но, откако Министерот за одбрана застана директно против одлуката на Претседателот, нашиот претставник воопшто не замина во мисијата.
2. После доаѓањето на власт на сегашниот Претседател, тој со свој Указ го разреши, односно го отповика претставникот кој повторувам – воопшто и не беше заминат (!)
3. Веднаш потоа, Министерот за одбрана номинираше друг претставник во НАТО. Според зборовите на Министерот за одбрана, за тоа лице согласност дал и Претседателот на државата. И тоа лице требаше уште пред година дена да замине во НАТО.
Но, според медиумите, имало безбедносна пречка и затоа и тоа лице не заминало во НАТО.
Е сега внимавајте: од сликата подолу може да се види дека Министерот за одбрана, иако лицето ги немало поминато безбедносните процедури за да биде упатено во НАТО, го земала со себе во официјална делегација на средба со, ни помалку ни повеќе, туку со генералниот секретар на НАТО, Столтенберг. Неверојатно!
Ако е точно дека поради безбедносни пречки, Македонија веќе 2 и пол години (!) нема свој претставник во НАТО, тогаш јавноста заслужува да знае:
1. Дали е запазена процедурата за назначување на наши претставници во странство?
2. Ако е запазена процедурата, кој е тој што потфрлил и зошто не ги земал во предвид сите факти, а со тоа го довел во заблуда Министерот и Претседателот на државата за да ја срамат државата пред НАТО?
3. Ако не е запазена процедурата, зошто не е? Кој е тој/таа што е над процедурите за да може да одлучува по сопствено убедување?
4. Ако сепак е запазена процедурата и Министерот знаел дека постои безбедносна пречка за лицето, зошто го довела во заблуда Претседателот на државата да дава согласност за такво лице и да ја срами државата?
5. Дали Претседателот знаел за какво лице дал согласност, но сепак се надевал дека можеби НАТО ќе се “смилува” или пак воопшто не знаел за кое лице дал согласност? Ако не знаел, зошто не знаел? Лично сум згрозен од ваквиот несериозен однос кон НАТО за чие членство се изначекавме генерации.
Да немате 2 и пол години претставник во НАТО е повеќе од поразително. Згора на тоа, веќе со Указ одреден претставник го понижија како најдолен криминалец. Кој Ви дава право да си играте со државните интереси но и со човечките судбини туку така?
Па како сакате да не‘ ценат од надвор кога самите не се цениме и не си ги почитуваме правилата и процедурите?
Кој ќе понесе ОДГОВОРНОСТ за овој скандал и јавната бламажа на државата? Повторно ли ќе си одмолчите, ќе дефокусирате и обвинувате дека е фејк њуз? Одговорност за ова мора да има!
