“Катастрофалните политики на Владата ја зацементираа македонската позиција во поглед на евроинтеграциите. Без разлика дали ќе добиеме датум за преговори по не знам кој пат, односно без разлика дали ќе се одржи меѓувладина конференција, Македонија сепак останува зацементирана на дното, пониско позиционирана дури и од Албанија. Кога викам пониско дури и од Албанија, не сакам да им одземам ништо на Албанците, туку сакам да ја потсетам македонската јавност дека кога пред 20 години Македонија ја потпишуваше Спогодбата за стабилизација и асоцијација, скоро сите наши братски ЈУ републики сé уште беа заглавени со последиците од воениот конфликт и ги обновуваа своите стопанства од долгогодишните и економски исцрпувачки војни.
Значи, Македонија беше прва држава која ја потпиша Спогодбата. Оттогаш до денеска, сите ги почнаа преговорите освен Македонија и БиХ, а Хрватска веќе е членка на ЕУ скоро деценија. Сите држави колку-толку напредуваат, освен Македонија која за жал назадува и во која од ден на ден се живее сé потешко. А зошто Македонија не напредува туку назадува?
Ќе се задржам само на последната година или две, а секој може да си направи паралели и за годините наназад:
Затоа што владеењето на правото е само флоскула и никој не одговара за ништо (освен политичките неистомисленици на кои дури им се креираат и случаи согласно потребите). Моралната одговорност пак е само обична придавка пред именката и е непостоечки институт во „нашата држава“. Затоа што правдата е приватизирана и е во склад со едностраниот поглед на лидерот на партијата. Без право и правда нема демократска држава (!)
Затоа што корупцијата и криминалот во кои се замешани највисоки структури на власта и државните органи се доживуваат како да се најнормална појава и на која граѓаните веќе се навикнаа.
Затоа што власта е подготвена да го уништи целото образование со цел да се задоволат нечии национални фрустрации, а за себе да добие уште едно тапкање по рамо од оние на кои преку своите советници им испраќа пораки со евроскептицизам и заплашување дека некој друг ќе го пополнел просторот што нема да го пополни ЕУ.
Затоа што скоро секојдневно се отпуштаат работници од реалниот сектор, а власта со цел да ги сокрие бројките и да краткорочно ја замаскира неспособноста за решавање на проблемите, масовно ја трупа државната и јавна администрација со нови вработувања. Наместо да се најде начин за транзиција на администрацијата преку создавање на услови за вработување односно инвестирање во приватниот сектор (оти тој е движечката сила за една држава), власта фрли сé на една карта – избори.
Затоа што преку масовните вработувања во изборна година, власта сака и да го намали гневот кај своите граѓани од нерамноправните политики кои ги води кон соседите, или да бидам попрецизен, од политиките кои соседите ги водат кон нас, а Власта молчи и одобрува сé што ѝ е побарано на Македонија.
Затоа што народот е разочаран и национално понижен од секојдневното гушење на патриотизмот од страна на оние кои распродаваат се што не е нивно: почнувајќи од името, националниот идентитет, јазикот, историјата, завршувајќи со државното земјиште.
Затоа што власта „мува на ја лази“ што е директно одговорна за труењето на сопствените граѓани преку канцерогени и токсични масла за кои дури и им платила на трујачите. Е сега на крај, се поставува прашањето, зошто е тоа така?Затоа што врхушката на власт не ја интересираат граѓаните и нивната безбедност и благосостојба, туку само личниот профит преку нарко и слични бизниси.
Затоа што сите ги знаат какви се и затоа лесно може да се манипулираат и да спроведуваат туѓи агенди.
Да се вратам на почеток, реков дека сосема е неважно дали ќе добиеме датум за преговори или не. Дури и да ги отпочнеме одамна заслужените преговори со ЕУ, оваа структура на власт не е во состојба да спроведе ништо конкретно од кое граѓаните ќе имаат бенефит. Ниту имаат потенцијал, ниту компетенција.
Со овие бандити на власт, ќе се продолжи со етничкиот инжинеринг врз Македонците, државата ќе продолжи да се задолжува, а народот ќе потоне во уште поголема сиромаштија и ќе се забрза иселувањето. Ова што ѝ го прават на сопствената држава е нехумано и неодговорно.
Народот многу брзо ќе мора да одлучи како ќе продолжи понатаму, т.е. дали ќе продолжи со оваа агонија или засекогаш на таквите авантуристи на најдемократски начин ќе им го покаже местото во темната страна на македонската историја.
-фејсбук статус на Драган Ковачки- член на Извршниот комитет на ВМРО-ДПМНЕ
