На социјалните мрежи се појавија фотографии од огромен чад кој се надвиснува над Пробиштип од градската депонија во овој град во Брегалничкиот регион.
Од фејсбук страницата “Воздух Пробиштип” ова го прогласија за еколошка катастрофа:
Еколошка катастрофа!! Смрдеа неподнослива се шири!
Веќе сите си го поставуваат прашањето зошто е вака?-Случајно е или пак нешто друго има во позадина??
-напишаа на фејсбук граѓани од Пробиштип.
За овој алармантен проблем реагираа и од Општинскиот комитет на ВМРО-ДПМНЕ во Пробиштип преку своја реакција на социјалните мрежи, која ја пренесуваме во целост во продолжение:
Почитувани сограѓани,
вчеравечер и официјално беше отворена летната сезона на горење на депонијата Озрен во Пробиштип, а денес целиот град и околните места се обвиени во неподнослива миризба.
И повторно на дело се покажува неспособноста на оваа власт да ги реши проблемите на граѓаните.
Пред неполни две години толку слатко лажеа и ветуваа дека веднаш по доаѓањето на власт ќе го решат овој горчлив проблем за жителите на Пробиштип. Свесно и бесрамно лажеа дека ќе воведат стражарска служба, за денес јавно да слушаме дека била преголема за оградување.
Впрочем како што лажеа и за се останато.
Само да потсетиме, зборуваме за истата депонија што започна да ги труе жителите на Пробиштип во месец јануари, гореше цел февруари, а беше угасната во март 2019 година.
Почитувани локални власти,
граѓаните не ги интересира кој, зошто или како ја запалил депонијата. Тоа е Ваша работа и работа на институциите. Граѓаните сакаат решение за овој проблем, како што им ветувавте, а цената на Вашето неработење ја плаќаат граѓаните, но за овој проблем ја плаќаат најскапо, со своето здравје.
Во оваа прилика повторно ќе ги запрашаме локалните власти: “Дали е ова реализацијата на проектот: “УРЕДУВАЊЕ НА ЛОКАЛНАТА ДЕПОНИЈА „ОЗРЕН“ ДО НЕЈЗИНАТА ДИСЛОКАЦИЈА” со рок на изведба до 2018 година, наведен во изборната програма на тогашниот кандидат за Градоначалник од СДСМ или пак е “ЧИСТИОТ ВОЗДУХ” кој што го ветувавте на жителите на Пробиштип.
Не, ова не е грижата која што ја заслужуваат пробиштипјани.
Оваа локална власт знае само да кажува лаги и невистини и да работи за сопствен и партиски интерес.
-напишаа на фејсбук од Општинскиот комитет на ВМРО-ДПМНЕ од Пробиштип.
