Денеска на прес конференција од партиското седиште Претседателот на опозициската ВМРО-ДПМНЕ од Делчево Сашко Ивановски го прозва актуелниот градоначалник на Делчево од редовите на СДСМ Горан Трајковски за упатените лаги на одржаната јавна трибина во центарот на Делчево. Ивановски го запраша градоначалникот Трајковски каде се ветените проекти од програмата кои што ветил дека ќе ги реализира за што ја доби поддршката од делчевчани во 2017 година.
Во продолжение во целост го пренесуваме текстот на прес конференцијата на Претседателот на ОК на ВМРО-ДПМНЕ Делчево Сашко Ивановски:
“Почитувани граѓани,
Градоначалникот на општина Делчево на отворена сцена пред сите граѓани јавно изнесе куп лаги и манипулации во обид да им се додвори на Оливер Спасовски и Зоран Заев за да си ја спаси фотелјата.
Јавно кажа и излажа дека ги има реализирано сите капитални проекти што ги ветил на граѓаните во неговата предизборна програма во 2017 година.
Вистината е дека од 14 предвидени проекти клучни и капитални од неговата предизборна програма има целосно реализирано само 3 проекти. Од овие три проекти еден е пешачкиот мост на реката Брегалница за кој поголем дел од сретствата за негова реализација се обезбедени и потпишани со Центарот за развој на источниот плански регион во 2017 година во мандатот на претходниот градоначалник. Вториот проект е градската капела за која дел од парите се исто така обезбедени од во мандатот на претходниот градоначалник како грант за успешно реализиран проект за доградба на детската градинка во 2017 година. Прашуваме: Доколку парите од овој грант не се употребени за изградба на гратската капела за што се пренаменети овие парични сретства?
Знаеме дека фабриката за вода која Горан Трајковски вети дека ќе ја реализира до 2020 година е со под 10% реализација.
Исто така проектот градски пазар, улици во населбата Пролет, улици во населбата Шумски расадник, и целосната замена на азбестните цевки со ПВЦ се со реализација под 10%.
Каде се изградените улици во населбата Ѕвегорска река, каде е доизградбата на кејот на реката Брегалница, мостот на улицата Индустриска, патот Делчево-Црна Скала, и новото противпожарно возило.Како математичарот Горан Трајковски успеа да пресмета дека има реализирано 84% од капиталните проекти, треба да излезе и да им објасни на делчевчани.”
