Во минатото цели три децении од воспоставувањето на независна современа македонска држава, една од најзапоставените групации на граѓани во Македонија се интелектуалците, наставниците, професорите, кои всушност во едни поинакви услови и секаде на друго место во демократскиот развиен свет се со сосема поинаков третман и статус во општеството. Луѓето во образовниот процес од кои што директно зависи иднината на државата во Македонија се ставени на маргините како во однос на влијание на севкупните состојби, така и во однос на нивните приходи за најблагородната работа што ја вршат за граѓаните во државата.
Токму од тие причини во најкус можен рок е потребно ваквата состојба да се надмине и тоа како резултат на сеопшт општествен напор и залагање на надлежните институции во Македонија.
Во таа насока во голем дел денеска беше посветена и прес конференцијата на Претседателот на ВМРО-ДПМНЕ Христијан Мицкоски кој се обврза лично себеси но и партијата ВМРО-ДПМНЕ за зголемување на платите на универзитетските професори, доцентите, вонредните професори и асистентите на факултетите. Притоа Мицкоски го афирмираше ставот дека тоа може да биде постигнато врз основа на внимателно анализирана методологија врз основа на општествено одржливи параметри на долг рок.
“Се обврзуваме на обнова која ќе донесе поголеми примања за Универзитескиот наставен кадар. И тоа воспоставување на методологија со која ќе обезбеди и ќе ги зголеми примањата на наставно образовниот кадар на универзитетите. И тоа до 100.000 денари за редовните универзитетски професори, до 80.000 денари за вонредните професори, до 60.000 денари за доцентите и до 45 илјади плата за асисистентите на факултетите. Ова значи 2.5 пати повеќе од тоа што денеска го обезбедува државата.
Ќе повторам, ќе дефинираме методологија според која редовните професори на универзитетите ќе имаат можност да дојдат до месечни примања од 100.000 денари загарантирани од државата. Вонредните 80.000, доцентите 60.000 и асистентите 45.000 денари.
Квалитетното високо образование подразбира инвестирање во подобри услови за работа, средства и други лабораториски ресурси, но и мотивиран кадар. Токму со оваа мерка ќе се стимулира квалитетот и мотивацијата на универзитетскиот наставен кадар. Да не ни се случува асистенти и доценти од универзитетите да напуштаат наставно образовен процес и да бараат подобра иднина поради тоа што примањата се 20-25.000 или нешто помалку од тоа.”
Потоа во продолжение на неговото обраќање пред нацијата Мицкоски се обврза и за зголемување на платите на наставниците и професорите во основното и средно образование:
“Се обврзуваме на обнова која ќе значи поголеми плати за професорите во основното и средното образование. Тоа подразбира доследно почитување на Колективниот договор. Доследно почитување на Колективниот договор и повисоки плати на наставно образовниот кадар во основното и средното образование.”
Како особено важен аспект Мицкоски се обврза и на модернизирање на средното стручно образование во функција на развој и работа на стопанството:
“Се обврзуваме на обнова која ќе опфати средно стручно образование во функција на стопанството, односно дуално средно образование. Ќе пристапиме кон проширување на дуалниот систем на стручното образование по принципот учење преку работа на реално работно место, кој ќе развие и стручни компетенции и вештини за адаптирање во работниот однос. Ваквата реформа ќе овозможи брзо вработување на стручниот кадар во компаниите во Македонија, со соодветно вреднување на трудот на работниците и се разбира ќе го намали иселувањето на млади луѓе од наша земја.”
