Точно една недела пред најголемиот христијански празник Велигден е празникот Цветници, а саботата пред Цветници се вика Лазарева Сабота или Лазарица.
Со Лазарева Сабота се поврзани повеќе обичаи и песни познати како лазарски. Ги изведуваат девојки во групи одејќи по куќите и низ населените места и пресретнувајќи ги луѓето. Лазарките му пеат посебна песна на секој човек според неговата возраст и статус и за тоа добиваат дарови, најчесто пари. Во овие песни се велича личноста, се посакуваат напредок на семејството, здравје и среќен живот на поединецот. Особено со многу лирски чувства се исполнети песните за малите деца како што е и оваа песна од Зборникот на браќата Миладиновци:
Ќе издвоиме една преубава песна од Зборникот на браќата Миладиновци по повод Лазарева сабота.
Малечко убоо, о Лазаре!
На диван ми седеше,
со јаболко играше,
мајка ле му викаше:
„Малечкоо убоо!
Доста седе на диван,
доста играш с јаболко.
данж те царот догледат,
данж ти царство поклонит!“
Уште речта не рече,
ми го царот здогледа
и му царство поклони.
